‘जस्सी जैसी कोई नही’ मालिकेत त्यांची भूमिका ठरली समकालीन ठसा उमटवणारी..!

मालवण | सुयोग पंडित : सुप्रसिद्ध तसेच राष्ट्रीय पुरस्कार विजेत्या आणि मराठी, हिंदी चित्रपट व मालिकांतील ख्यातनाम अभिनेत्री उत्तरा बावकर यांचे काल दीर्घ आजाराने पुणे येथे निधन झाले. त्या ७९ वर्षांच्या होत्या. उत्तरा यांच्या परिवारात त्यांचा एक भाऊ, एक बहीण, वहिनी व भाचा आहे. राष्ट्रीय पुरस्कार विजेत्या उत्तरा बावकर यांच्या कुटुंबीयांच्या जवळच्या सूत्रांनी ही माहिती दिली आहे.

अभिनय व आवाजी अभिनय यावर त्यांची हुकूमत होती. नॅशनल स्कूल ऑफ ड्रामात त्यांनी अनेक वर्षे अध्यापनाचे काम केले. नॅशनल स्कूल ऑफ ड्रामामध्ये अभिनयाचे बारकावे शिकलेल्या उत्तरा बावकर यांनी ‘मुख्यमंत्री’मध्ये पद्मावती, ‘मीना गुर्जरी’मध्ये मीना, शेक्सपियरच्या ‘ऑथेलो’मध्ये डेस्डेमोना आणि नाटककार गिरीश कर्नाड यांच्या ‘तुघलक’ नाटकात आईची भूमिका साकारली होती. त्यांनी लोकप्रिय नाटकांमध्ये संस्मरणीय पात्रे साकारली.

गोविंद निहलानी दिग्दर्शित ‘तमस’ या चित्रपटातील अभिनयानंतर उत्तरा बावकर प्रसिद्धीच्या झोतात आली. सुमित्रा भावे यांच्या वैशिष्ट्यपूर्ण चित्रपटातही त्यांनी काम केले. याशिवाय त्यांनी उडान, अंतराल, रिश्ते कोरा कागज, नजराना, जस्सी जैसी कोई नहीं आणि जब लव हुआ यांसारख्या अनेक टीव्ही मालिकांमध्येही काम केले.