मूळ मालवणचे आहेत राजापुरे बंधू.

मालवण | सुयोग पंडित : मूळ सिंधुदुर्ग जिल्ह्यातील मालवणचे असलेल्या तन्मय संतोष राजापुरे आणि आयुष संतोष राजापुरे यांनी सि.बी. एस.सी.राष्ट्रीय जलतरण स्पर्धेत चमकदार कामगिरी करत पदकांची कमाई केली आहे.

२१ ते २५ जानेवारी दरम्यान गुजरातच्या राजकोट येथे संपन्न झालेल्या या स्पर्धेत तन्मय राजापुरे याने १४ वर्षांखालील गटात, ५० मीटर बॅकस्ट्रोक प्रकारात रौप्य पदक व ५० बटरफ्लाय प्रकारात कांस्य पदक प्राप्त केले. २०० मीटर पोहणे प्रकारात त्याला राष्ट्रीय स्तरावर ४ थे स्थान प्राप्त झाले.

आयुष राजापुरे याने ११ वर्षांखालील गटात, ५० मीटर बटरफ्लाय प्रकारात कांस्य पदकाची कमाई केली तर २०० मीटर पोहण्यात त्यानेही राष्ट्रीय स्तरावर ४थे स्थान प्राप्त केले.

हे दोघेही कै.पि.बी.ज़ोग इंग्लिश मिडियम स्कूल, मयूर वसाहत,पुणे येथे शिकत आहेत. वयाच्या प्रत्येकी ७ व्या वर्षांपासून दोघांनीही जलतरण या प्रकाराला व्यावसायिक मार्गदर्शनाखाली सुरवात केली.
दोन्ही राजापुरे बंधुंना ‘चॅम्पियन ॲक्वॅटीक क्लब, पुणे’ चे प्रशिक्षक विनय मराठे यांचे प्रशिक्षण लाभत आहे. २ फेब्रुवारीपासून पुण्यातल्या बालेवाडी क्रीडा संकुलात सुरु होणार्या ५० मीटर बॅकस्ट्रोक व बटरफ्लाय तसेच २०० मीटर पोहणे स्पर्धा प्रकारासाठी
तन्मय राजापुरे राज्य जलतरण स्पर्धेत पात्र ठरला आहे.

तन्मय आणि आयुषचे वडिल श्री संतोष राजापुरे हे मूळ मालवण शहरातील. मालवणच्या शासकीय तंत्रनिकेतनमध्ये (गव्हर्नमेंट पाॅलिटेक्निक GPM) त्यांनी डिप्लोमा शिक्षण घेतले आहे. त्यांनाही ॲथलेटीक्स व जिम्नॅशिअम प्रकारात रुची होती.
सिंधुदुर्ग जिल्ह्यातील जास्तीत जास्त बालक व युवकांनी जलतरण तसेच ओपन ओशन वाॅटर स्विमींग व इतर ॲथलेटीक्स मध्ये सहभाग घ्यावा आणि यश संपादन करावे अशा सदिच्छाही त्यांनी आपली सिंधुनगरी चॅनेलशी बोलताना दिल्या आहेत.