सावळा विठ्ठल, संत बाळूमामा , पैगंबर मोहम्मद ते प्रभू येशूंची प्रतिकात्मक ‘घोंगडीची’ ओळख घेतलेली संस्था ठरली कोकण संस्था.

बांदा | राकेश परब (विशेष) : ईश्वराच्या विविध रुपांची ओळख घेताना मनुष्याला काही दाखले दिले जातात . विठूमाऊली, संत बाळूमामा, पैगंबर मोहम्मद, प्रभू येशू किंवा अन्य देव देवतांचे वर्णन करताना त्यांच्या सोबत ‘घोंगडी’ असल्याचे वर्णन आपण ऐकत आलेलो आहोत. काय असते ही नेमकी घोंगडी किंवा काय सुचवते ही घोंगडी तथा ब्लँकेट याची ओळख ज्यांना लागते ते आपसुकच कुठलीही धार्मिक कथा न वाचताही ईश्वराच्या जवळचेच अंश असतात असे म्हणणे वावगं ठरणार नाही. ‘ब्लॅकेट’ म्हणजे ऊब आणि ती ऊब त्यांना जास्त आवश्यक असते ज्यांच्या डोक्यावर छप्पर नसते किंवा थंडीपासून बचाव करायच्या भिंती असतात. अशा माणसांना मदत करावी हाच सर्व ईश्वरी संदेश दाखवते ती घोंगडी.

कोकण कला व शिक्षण विकास संस्थेने खर्या अर्थाने या ‘घोंगडी’ मागचा संदेश ओळखून एक संदेशात्मक प्रकल्प राबवला आहे.
सध्या थंडीची लाट देशभर पसरली आहे. पुणे शहराचा पारा देखील ८ अंशच्या खाली घसरला आहे. अशा कडाक्याच्या थंडीत पोटाची खळगी भरण्यासाठी स्थलांतर करून शहरात कामासाठी आलेली लोक राहण्यासाठी घर नसल्याने रात्री रस्त्याच्या कडेला खुल्या आकाशाची चादर ओढून झोपतात. मात्र या काव्यमय वाक्यातील चादर त्यांना ऊब देण्यासाठी पुरेशी नसते.ज्या गुलाबी थंडीत आपल्या सारखे लोक २-२ चादरी ओढून झोपतात अशा गारवटणाऱ्या ऐन थंडीत अनेक कोवळी मुले पाय पोटात घेऊन कुडकुडत झोपलेली पाहून मन उद्विग्न तर होतंच. पण अशा थंडीमुळे कित्येक मुले सर्दी, ताप, श्‍वसनविकार, दमा, कोरडा खोकला, अशा अनेक विषाणूजन्य आजाराला देखील बळी पडतात हा विचार देखील मनाला सतावतो.
अशा आजारांपासून रस्त्यावरील लोकांना वाचवण्यासाठी आणि थंडीत त्यांच्या लेकरांना मायेची ऊब देण्यासाठी दरवर्षी वेगवेगळ्या भागात
कोकण कला व शिक्षण विकास संस्था अशा कष्टकरी बेघर लोकांना उबदार कपडे, चादरी, चटया तसेच ब्लॅंकेटचे वाटप करत असते. यावर्षी ही मुंबईतील दादर परिसर आणि पुणे येथील कात्रज परिसरातील कुडकुडी भरणाऱ्या थंडीत वास्तव्य करणाऱ्याना शेकडो लोकांना मायेची ऊब मिळावी म्हणून संस्थेकडून ब्लॅंकेट्सचे वाटप करण्यात आले.
यावेळी या वाटपात संस्थेकडून अनेक कार्यकर्ते सहभागी झाले. मुंबईतील वाटपात सुरज कदम, साक्षी पोटे, बिना अहिरे, ऋतुजा पवार आणि योगिता निजामकर तर पुणे येथील वाटपात विशाल महांगरे आरती भोज, पूनम सुतार आणि श्वेता जैन यांनी या उपक्रमात सहभाग घेऊन कडाक्याच्या थंडीचा देखील अनुभव घेतला.

धर्म माणुसकीचे मर्म आणि कर्म शिकवतो हाच संदेश ओळखलेल्या कोकण कला व शिक्षण विकास संस्थेच्या या कार्याची प्रशंसा होत आहे.