मतदान प्रक्रिया शांततेत पूर्ण..

राकेश परब | सहसंपादक :
संपूर्ण जिल्ह्याचे लक्ष असलेल्या बांदा शहर ग्रामपंचायतच्या सरपंच पदासह १४ जागंसाठी काल पार पडलेल्या निवडणुकीत ५ हजार २७१ पैकी ३ हजार ७५३ मतदारांनी (७१.२० टक्के ) मतदानाचा हक्क बजावीला. शहरातील प्रभाग क्रमांक ३ मधील निमजगा मतदान केंद्रावर दोनवेळा मशीन बंद पडल्याने सायंकाळी साडेसहा वाजेपर्यंत मतदान प्रक्रिया सुरु होती. कोणताही अनुचित प्रकार न घडता मतदान प्रक्रिया सुरळीत पार पडली.

अतिरिक्त जिल्हा पोलीस अधीक्षक नितीन बगाटे, सावंतवाडीच्या उपविभागीय पोलीस अधिकारी डॉ. रोहिणी सोळंखे यांनी बांदा येथे भेट देत निवडणूक प्रक्रियेची माहिती घेतली. बांदा पोलीस निरीक्षक शामराव काळे, समीर भोसले यांच्यासह पोलीस कर्मचारी बंदोबस्तसाठी तैनात होते.
बांदा शहरात प्रभाग क्रमांक १ मध्ये १२९७ पैकी ८२७ (६३.७६ टक्के) मतदारांनी मतदान केले. प्रभाग क्रमांक २ मध्ये ११०५ पैकी ८४७ (७६.६५ टक्के) मतदारांनी मतदान केले. प्रभाग क्रमांक ३ मध्ये १३७४ पैकी १०२४ (७४.४५ टक्के) मतदारांनी मतदान केले. प्रभाग क्रमांक ४ मध्ये ७७४ पैकी ५४२ (७०.०२ टक्के) मतदारांनी मतदान केले. प्रभाग क्रमांक ५ मध्ये ७२१ पैकी ५१४ (७१.२८ टक्के) मतदारांनी मतदान केले. एकूण ५२७१ पैकी ३७५४ (७१.२० टक्के) मतदारांनी मतदानाचा हक्क बजावीला.