संतोष साळसकर | ब्युरोचीफ :
महाराष्ट्रातील ७ हजार ७५१ ग्रामपंचायतीच्या निवडणुकीचा कार्यक्रम जाहीर झाला असून त्यामध्ये कणकवली तालुक्यातील ६१ पैकी ५८ ग्रा.पं. चा समावेश आहे. कणकवली तालुका हा जिल्ह्यात राजकीय संवेदनशील तालुका म्हणून ओळखला जात असल्याने जवळपास सर्वच ग्रा.पं. मध्ये रंगतदार लढती होणार आहेत. तर काही ग्रा.पं.मध्ये चुरशीची निवडणूक होणार असल्याने आतापासूनच राजकीय चर्चांना जोर चढला आहे. या निवडणुकीवर आगामी जि.प.,प.स. निवडणुकीची रंगीत तालिम होणार असल्याने त्याकडे संपूर्ण तालुक्याचे लक्ष लागून राहिले आहे.
सिंधुदुर्गात कणकवली तालुक्यामध्ये कोणतीही निवडणूक ही अतिशय चुरशीने आणि जोरदार राजकीय घडामोडीमधून होत असते. तालुक्यातील भिरवंडे, गांधीनगर व तोंडवली-बावशी अशा तीन ग्रा.पं. वगळता इतर ५८ ग्रा.पं.ची निवडणूक जाहीर झाली आहे. त्यामध्ये १७ सदस्य संख्या असलेल्या फोंडाघाट व कलमठ, १३ सदस्यसंख्या असलेली कासार्डे व ११ सदस्यसंख्या असलेली हरकुळबुद्रुक, कळसुली, नाटळ, नांदगाव, सांगवे व खारेपाटण अशा २६ ग्रा. पं. च्या निवडणुकीमध्ये सर्वाधिक चढाओढ पहायला मिळणार आहे. तर उरलेल्या ग्रा.पं.मध्येही तेवढ्याच ताकदीने कार्यकर्ते रिंगणात उतरणार आहेत.
तालुक्यातील इतर ग्रा.पं. मध्ये असलदे, आशिये, आयनल, भरणी, बिडवाडी, बोर्डवे, चिंचवली, डामरे, दारिस्ते, दारूम, दिगवळे, घोणसरी, हळवल, हरकुळखुर्द, हुंबरठ, जानवली, करंजे, कासरल, करूळ, कसवण-तळवडे, कोळोशी, कोंडये, कुंभवडे, कुरंगवणे-बेलें, लोरे, माईण, नडगिवे, नागवे, नरडवे, ओसरगाव, ओझरम, पिसेकामते, पियाळी, साकेडी, साळीस्ते, सांगवे, सातरल, शेर्पे, सावडाव, शिडवणे, शिरवल, शिवडाव, तळेरे, तरंदळे, तिवरे, वागदे, वाघेरी, वायंगणी, वरवडे, वारगाव अशा एकूण ५८ ग्रा.पं.ची निवडणूक जाहीर झाली आहे.