नुकसानग्रस्त शेतकर्यांच्या बांधावर पोचून पंचनामे करावेत अशी करणार मागणी.

कणकवली | ब्युरो न्यूज : सिंधुदुर्ग जिल्ह्यातील कणकवली येथे मनसे तर्फे उद्या प्रांताधिकारी यांना निवेदन देण्यात येणार असल्याचे मनसे सिंधुदुर्ग जिल्हा उपाध्यक्ष दया मेस्त्री यांनी जाहीर केले आहे.
गेल्या कित्येक दिवसांपासून शेतकरी हा चिंतेत आहे. तोंडी आलेला घास पुनःश्च त्याच्या तोंडातून निघून गेलाय. मात्र शासन प्रशासन अद्यापही निश्चल असल्याचे पहावयाला मिळते आहे असे दया मेस्त्री यांनी स्पष्ट केले आहे.
अगदी पेरणी पासून ते भात कापणीपर्यंत शेतकरी आपल्यासह कुटुंबाचे पोट भरण्यासाठी राबत असतो. मात्र त्या सगळ्या कष्टावर पावसाचे पाणी पडते आणि तोंडी आलेला घास दुरावतो.
शेवटी शेतकऱ्याला अपेक्षा राहते ती फक्त शासकीय मदतीची म्हणजेच नुकसानभरपाईची. असे असतानाही शासन प्रशासनाच्या पायऱ्या त्या नुकसानग्रस्त शेतकऱ्यांना चढाव्या लागतात. मग हे अधिकारी फक्त कार्यालयात बसून करतात तरी काय, शेतकऱ्यांनी करायचे काय , कोणीतरी प्रशासकीय अधिकारी येणार, पाहाणी करणार आणि आपल्या झालेल्या पिकाच्या नुकसानीची भरपाई देणार अशा अनेक विचारात शेतकरी जगत आहेत. आता भात कापणीला सुरुवात होईल तोपर्यंत अवकाळी पावसाने पुन्हा एकदा थैमान घालायला सुरुवात केली. तोंडाशी आलेला घास दुरावला किमान आता तरी महसूल प्रशासन या नुकसानीचे पंचनामे करून नुकसान भरपाई देणार आहे आणि ती नेमकी कधी देणार आहे याबाबत उद्या सकाळी १० वाजता प्रांताधिकारी कणकवली यांना मनसेच्या वतीने निवेदन देणार असल्याची माहिती दया मेस्त्री यांनी दिली आहे .
शासन, प्रशासनाने या गंभीर समस्येची तात्काळ दखल घेऊन शेतकऱ्यांच्या बांधावर पोहोचून नुकसानीचे पंचनामे करावेत अशा सूचना देखील निवेदनाच्या माध्यमातून त्यांनी केल्या आहेत.