कणकवली | प्रतिनिधी : भारतीय जनता पार्टी महाराष्ट्र च्या प्रदेश कार्यकारणी सदस्य प्रज्ञा प्रदीप ढवण यांनी मुंबईच्या माजी महापौर किशोरी पेडणेकर यांच्यावर टीकेची झोड उठवली आहे.
मुंबईच्या माजी महापौर किशोरी पेडणेकर या मातोश्रीच्या परिसरातील असंतुष्ट आत्मा आहेत असे म्हणत त्यांनी शिवसेना ही किशोरी पेडणेकर यांच्या उपजीविकेचे साधन असल्यामुळे पडत्या फळाची आज्ञा घेऊन त्या मातोश्रीचे काम पाहतात अशी टीका भारतीय जनता पार्टी महाराष्ट्र च्या प्रदेश कार्यकारणी सदस्य प्रज्ञा प्रदीप ढवण यांनी केली.

महाराष्ट्राच्या जनतेने यापूर्वी देखील किशोरीताईंचे विविध स्टंट आणि नौटंकी पाहिली आहे. खोटे खोटे रडणे , विचित्र कंठ काढून बोलणे, विचित्र चाली लाऊन गाणी म्हणणे असे विचित्र चाळे करून प्रसिद्धी मिळवणारी त्या महिला असून मुंबई महानगरपालिकेत महापौर असताना त्यांनी प्रचंड भ्रष्टाचार केला त्याचप्रमाणे मातोश्रीची पहिली महिला कॅश कलेक्टर म्हणून काम पाहिले असा आरोप देखील केला आहे.

केंद्रीय मंत्री नारायण राणे साहेब किशोरी पेडणेकर यांना आजही आपली बहीण मानतात.त्यांची कौटुंबिक संबंध आजही तेवढेच आहेत परंतु मातोश्रीला खुश करण्यासाठी आणि पुढील निवडणुकांच्यात आपले तिकीट कापू नये यासाठी राणे साहेबांवर टीका करायची हा त्यांचा हेतू आहे पण यापुढे राणे साहेबांवर पातळी सोडून टीका केल्यास तुमचे जनतेला ज्ञात नसलेले विषय आम्ही ज्ञात करून देऊ याचे भान ठेवावे असा इशारा प्रदेश कार्यकारणी सदस्य प्रज्ञा ढवण यांनी दिला आहे .