मसुरे | प्राजक्ता पेडणेकर : सिंधुदुर्ग जिल्हा व्यवसाय शिक्षण व प्रशिक्षण अधिकारी श्री. रमण फकीर पाटील यांची “उपसंचालक, व्यवसाय शिक्षण व प्रशिक्षण, मुख्य कार्यालय, मुंबई” या पदावर पदोन्नती झाली आहे. श्री. रमण पाटील यांची “प्राचार्य, औद्योगिक प्रशिक्षण संस्था, नाशिक” या पदावरुन बदली होऊन ते ०१ सप्टेंबर २०२० रोजी “जिल्हा व्यवसाय शिक्षण व प्रशिक्षण अधिकारी, सिंधुदुर्ग” या पदावर हजर झाले होते. सिंधुदुर्ग जिल्ह्यामध्ये कार्यरत असताना त्यांच्या पदासह जिल्ह्यातील अतिरिक्त १२ आणि मुख्य कार्यालयातील एक अशा एकूण १४ पदांचा कार्यभार त्यांनी सक्षमपणे सांभाळला होता. त्यांच्या कारकिर्दीत सिंधुदुर्ग जिल्ह्यातील शासकीय तसेच अशासकीय अनुदानित संस्थांमधील कर्मचाऱ्यांची सेवाविषयक आणि लेखाविषयक अनेक प्रलंबित कामे मार्गी लागली होती. त्यांच्या नेतृत्वाखाली प्रशिक्षण संस्थांमधील प्रवेशासाठी “Mission 100% Admission” राबवून ते यशस्वी केले आहे. आयटीआय मध्ये प्रवेश घेणाऱ्या दहावी किंवा बारावी अनुत्तीर्ण प्रशिक्षणार्थ्यांना उत्तीर्ण होण्याची संधी देणारी “समकक्षता” योजना त्यांच्याच कालावधीत जिल्ह्यामध्ये सुरु झाली होती. जिल्ह्यातील संस्थांमध्ये प्रशिक्षण घेऊन उत्तीर्ण होणाऱ्या प्रशिक्षणार्थ्यांना रोजगार तसेच शिकाऊ उमेदवारीच्या संधी उपलब्ध होण्यासाठी औद्योगिक आस्थापनांची नोंदणी तसेच शिकाऊ उमेदवारीसाठी स्थित जागांची संख्याही त्यांच्या कारकिर्दीत वाढली होती.
प्रशासकीय गतीमानता आणि संपूर्ण पारर्शक कारभार ही त्यांच्या कामकाजाची खास वैशिष्ट्ये होती. कुशल मनुष्यबळासाठी संपूर्ण जगाचे लक्ष भारताकडे असून भारत देश जगात महासत्ता बनण्यासाठी, राज्यातील प्रशिक्षित कुशल मनुष्यबळ निर्माण करण्यासाठी महत्तवपूर्ण योगदान देण्याबरोबरच शाश्वत विकास ध्येये पूर्ण करण्यासाठी जास्तीत
जास्त प्रयत्न करणार असल्याचे त्यांनी प सांगितले आहे. रमण पाटील यांच्या नियुक्ती बद्दल शैक्षणिक क्षेत्रातून अभिनंदन होत आहे.
फोटो: रमण पाटील