कणकवली | प्रतिनिधी : सिंधुदुर्ग जिल्ह्यातील विविध तालुक्यात सध्या अज्ञात चोरट्यांनी बंद फ्लॅटस्, देवळातील फंडपेट्या या नंतर आता सार्वजनिक मालमत्तेवर डोळा ठेवून चोरीचे डाव आखले आहेत.
अशाच एका अज्ञात चोरट्याने लोरे नं. १ येथील गव्हाळी व्हाळवरच्या लोखंडी साकवाच्या १० हजार रुपये किमतीच्या ७ लोखंडी प्लेट्स अज्ञात चोरट्यानी लंपास केल्या आहेत.
ही गोष्ट २० सप्टेंबरला निदर्शनाला आल्यानंतर
याबाबतची तक्रार कणकवली पोलीस ठाण्यात जिल्हा परीषद बांधकाम उपविभाग कणकवली येथिल कनिष्ठ अभियंता वर्षाराणी जाधव यांनी नोंदविली आहे. पोलिसांनी या घटनेबाबत अज्ञाता विरोधात गुन्हा दाखल केला आहे.

सार्वजनिक बांधकाम विभागाने लोरे गव्हाळी व्हाळावर मार्च १९८७ मध्ये लोखंडी साकव बांधला होता. हा साकव जिल्हा परिषद उपविभागाकडे २८ मे १९८७ रोजी देखभाल व दुरुस्ती कामी हस्तांतरीत केला गेला होता. या साकवाच्या लोंखडी साहित्याची चोरी झाल्याची माहिती ग्रामसेवक ऋतुराज कदम यांनी सौ. जाधव यांना दिली. त्यानंतर शाखा अभियंता श्री. सुतार यांच्यासह लोरेत जाऊन सरपंच अजय रावराणे यांच्यासह घटनास्थळी पाहणी करण्यात आली. यावेळी साकवावरच्या ७ लोखंडी प्लेट आढळल्या नाहीत. प्लेटस चोरीस गेल्याची खात्री झाल्यानंतर पोलिसांत फिर्याद दाखल करण्यात आली. या घटनेचा अधिक तपास कणकवली पोलीस करत आहेत.

(फोटो प्रातिनिधिक: गुगल)