ओरोस | प्रतिनिधी : जागतिक किडनी दिनानिमित्त सिंधुदुर्ग जिल्हा रुग्णालय ( ओरोस, सिंधुदुर्गनगरी) येथे २१ सप्टेंबरला सकाळी ११ वाजता जागतिक किडनी दिनाचे आयोजन करण्यात आले आहे. यामध्ये किडनीच्या रुग्णांकरिता तज्ज्ञ डॉक्टरांकडून मार्गदर्शन व तपासणी कार्यक्रम आयोजित करण्यात आली असल्याची माहिती जिल्हा शल्य चिकित्सक डॉ. श्रीपाद पाटील यांनी दिली.
आधुनीक युगात सर्वत्र तरुण वयातील व्यक्तींमध्ये किडनीचे आजार होण्याचे प्रमाण वाढलेले आहे. तसेच वय झालेल्या व्यक्तींमध्येदेखील रक्तदाब, मधुमेह, इतर गंभीर आजार असतात. त्यामुळे किडनीचे आजार होत आहेत. या आजारावर किडनी बदलणे व किडनी डायलेसिस औषधोपचार केले जातात. या आजारासाठी जागतिक किडनी दिन सर्वत्र राबविण्यात येतो. यानिमित्त २१ सप्टेंबर रोजी सकाळी ११ वाजता जिल्हा रुग्णालयाच्या आनंदीबाई जोशी सभागृहामध्ये किडनीच्या रुग्णांकरिता तज्ज्ञ डॉक्टरांकडून मार्गदर्शन व तपासणी कार्यक्रम आयोजित केले आहेत. त्याकरिता इच्छूक किडनीच्या आजाराचे रुग्ण व त्यांच्या नातेवाईकांनी उपस्थित राहवे. तसेच सिंधुदुर्ग जिल्हा केमिस्ट ॲण्ड ड्रगिस्ट असोसिएशनच्या प्रतिनिधींनीही उपस्थित राहवे, असे आवाहन जिल्हा शल्य चिकित्सक डॉ. श्रीपाद पाटील यांनी केले आहे.