विरोधी गटनेता सुशांत नाईक अथवा नगरसेवक कन्हैया पारकर यांना देखील स्थान दिले जाणार..?

विवेक परब | एडिटोरिअल असिस्टंट : सिंधुदुर्ग जिल्ह्यातील कणकवली शहराच्या प्रस्तावीत शहर तथा नगर विकास आराखडयाबाबत आज नगरपंचायत सभागृहात झालेल्या बैठकीत नगराध्यक्ष समीर नलावडे यांनी डी. पी. प्लॅन कमिटीत विरोधी गटनेता सुशांत नाईक अथवा नगरसेवक कन्हैया पारकर यांना देखील स्थान दिले जाईल असे सांगत मनाचा मोठेपणा दाखवला. कणकवली शहर विकास आराखड्याबाबत सहाय्यक नगरचनाकार देसाई यांच्या प्रमुख उपस्थितीत नगराध्यक्ष समीर नलावडे यांच्या अध्यक्षतेखाली आज नगरपंचायत सभागृहात बैठक झाली.

‘डी पी प्लॅन’ कमिटीमध्ये नियमानुसार स्टँडिंग कमिटी चे सत्ताधारी ३ सदस्य असतात. मात्र नियमांच्या पलीकडे जात शहर विकासाचा आरखडा असल्यामुळे नगरपंचायतमध्ये सत्तेत मित्रपक्ष असलेल्या राष्ट्रवादी कॉंग्रेसचे नगरसेवक अबिद नाईक आणि विरोधी नगरसेवकही या कमिटीत असावे यासाठी नगराध्यक्ष नलावडे यांनी विरोधी नगरसेवकांना आपला प्रतिनिधी देण्याबाबत सूचना केली.
या बैठकीला मुख्याधिकारी अवधूत तावडे, उपनगराध्यक्ष बंडू हर्णे, सत्ताधारी गटनेता तथा आरोग्य सभापती संजय कामतेकर, बांधकाम सभापती ऍड. विराज भोसले, राष्ट्रवादी काँग्रेसचे नगरसेवक अबिद नाईक नगरसेवक अभि मुसळे, विरोधी गटनेता सुशांत नाईक, कन्हैया पारकर, रुपेश नार्वेकर, मेघा गांगण, उर्वी, कविता राणे, मानसी मुंज, माही परुळेकर, माजी उपनगराध्यक्ष किशोर राणे आदी उपस्थित होते.