कणकवली / उमेश परब : कणकवली पोलीस ठाणे प्रभारीपदी पोलीस निरीक्षक विजय यादव यांची नियुक्ती पोलीस अधीक्षक राजेंद्र दाभाडे यांनी केली आहे. २४ ऑगस्टपासून विजय यादव यांनी कणकवली पोलीस निरीक्षकपदाचा कार्यभार सांभाळला आहे. राणेंच्या जनआशीर्वाद यात्रेआधी मावळते पोलीस निरीक्षक अजमुद्दीन मुल्ला यांची तब्बेत खालावली. प्रकृती अस्वास्थ्यामुळे पीआय मुल्ला हे रजेवर गेल्यामुळे त्यांच्या जागी तात्काळ विजय यादव यांची कणकवली पोलीस ठाणे प्रभारीपदी बदली करण्यात आली असून २४ ऑगस्टपासून पोलीस निरीक्षक यादव यांनी पदभार स्वीकारला आहे. पोलीस निरीक्षक यादव याना तब्बल ३८ वर्षांचा पोलीस दलातील अनुभव असून त्यांनी पोलीस दलात विविध ठिकाणी सेवा बजावली आहे. १९८३ साली सिंधुदुर्ग जिल्हा पोलिस दलात भरती झालेल्या विजय यादव यांना खात्यांतर्गत २००० साली पोलीस उपनिरीक्षकपदी बढती मिळाली. त्यानंतर यादव यांनी बांदा पोलीस स्टेशन, मालवण पोलीस स्टेशन, लोहमार्ग मुंबई कुर्ला पोलीस स्टेशन, पोलीस आयुक्त नवी मुंबई येथे सेवा बजावली आहे. तळकोकणात हातखंबा येथे नॅशनल हायवे पोलीस केंद्र निर्मितीनंतर एपीआय असताना विजय यादव यांनी रत्नागिरी सिंधुदुर्ग हायवे टॅब ची जबाबदारी कुशलतेने सांभाळली होती. त्यांनतर सीआयडी क्राईम पुणे सिंधुदुर्ग युनिट मध्ये पीआयपदी सेवा बजावली. पोलीस निरीक्षक पदी असतानाच यादव यांनी पोलीस आयुक्तालय अमरावती शहरातील गाडगेनगर पोलीस स्टेशनमध्ये सेवा बजावली आहे. पोलीस दलात कर्तव्यदक्ष आणि दिर्घअनुभवी पोलीस अधिकारी म्हणून पोलीस निरीक्षक विजय यादव यांची ख्याती आहे. कणकवली तालुक्यात कायदा आणि सुव्यवस्था राखण्यासाठी समाजातील सर्व घटकांना विश्वासात घेऊन काम करणार असल्याचे यादव यांनी सांगितले.