बांदा | राकेश परब :
बांदा शहरात महामार्गावार असलेल्या रॉयल कॅश्यूचे दुकान अज्ञात चोरट्यानी फोडून आतील सुमारे ६० हजार रुपये किमतीचे ५० किलो काजुगर लंपास केलेत. ही घटना आज सकाळी उघडकीस आली.
सरपंच अक्रम खान यांनी याठिकाणी येत पाहणी करत शहरातील जनतेला चोरट्यापासून सावध राहण्याच्या सूचना दिल्या आहेत. बांदा पोलिसांनी घटनास्थळी येऊन प्राथमिक चौकशी केली. मात्र दुकान मालकाने तक्रार करण्यास नकार दिल्याने या घटनेची नोंद पोलीस ठाण्यात करण्यात आली नाही.

याबाबत सविस्तर माहिती अशी कि, महामार्गावर भर वस्तीत रॉयल काजूचे दुकान आहे. गेल्यावर्षी देखील दुकान फोडून आतील सामान चोरट्यानी लंपास केले होते. आज सकाळी दुकान मालक दुकान उघडण्यासाठी आले असता त्यांना शटरची दोन्ही कुलपे तोडलेल्या स्थितीत आढळली. दुकानातील सर्व सामान असताव्यस्त टाकलेले आढळले. नवीनच खरेदी केलेले ५० किलो काजूचे पोते चोरल्याचे लक्षात आले. बांदा सरपंच अक्रम खान, ज्ञानेश्वर सावंत, हुसेन मकानदार, निलेश देसाई, बाबा गाड यांनी घटनास्थळी भेट देत पाहणी केली. यावेळी बांदा पोलिसांना कल्पना देण्यात आली. पोलीस उपनिरीक्षक समीर भोसले, हवालदार सिद्धार्थ माळकर, संजय हुंबे यांनी घटनास्थळी येऊन माहिती घेतली. चोरीच्या घटनेची बांदा पोलिसात नोंद नसल्याचे सांगण्यात आले.