बांदा | राकेश परब :
मुंबई गोवा महामार्गावर बांदा कट्टा काॅर्नर येथे कार मध्ये वेगळा कप्पा बनवून त्यातून दारू वाहतूक केल्याप्रकरणी गुजरात -जुनागड येथील दोघांना स्थानिक गुन्हा अन्वेषण शाखेच्या पथकाने अटक केली. या कारवाईत ७० हजार ८०० रुपये किमतीच्या गोवा बनावटीच्या दारूसह चार लाखाची मारुती इको गाडी जप्त करण्यात आली आहे. ही कारवाई आज पहाटे शहरात बांदा-कट्टा काॅर्नर येथे करण्यात आली.
बेकायदा दारू वाहतूक प्रकरणी सलपतगिरी मेघनाथपंथी चंदूगिरी (वय ३५) व भरतभाई पोपटभाई माजा (वय २८, दोघे रा. गुजरात) अशी संशयितांची नावे आहेत. ही कारवाई गुरुवारी सकाळी सहा वाजण्याच्या सुमारास मुंबई-गोवा महामार्ग कट्टा काॅर्नर परिसरात करण्यात आली.
याबाबत बांदा पोलिसांकडून मिळालेली अधिक माहिती अशी की,दारू वाहतुकीच्या पार्श्वभूमीवर बांदा शहरात कट्टा कॉर्नर महामार्गवर गुरुवारी सकाऴी सहा वाजण्याच्या सुमारास स्थानिक अन्वेषण विभागाच्या पथकाने सापळा रचला होता. त्यादरम्यान गोव्याहून ही इको कार येताना दिसली. यावेळी त्या गाडीची तपासणी केली असता कार च्या मागील डिकीत व सीटवर गोवा बनवटीच्या दारूचे विविध ब्रँडचे खोके आढळले. पोलिसांनी सुमारे ७३ हजाराची दारू व मोटार जप्त केली. याप्रकरणी गुजरात येथिल दोघांना अटक करण्यात आली. बांदा पोलिसांत गुन्हा नोंद करण्यात आला आहे.
ही कारवाई स्थानिक गुन्हे अन्वेषण विभागाचे अधिकारी यशवंत आरमारकर, पोलीस हवालदार गुरुनाथ कोयंडे, जी.पी. पोहेंदे, प्रकाश कदम, अनिल धुरी, प्रवीण वालावलकर, चंद्रकांत पालकर, सर्वेश नार्वेकर, प्रथमेश गावडे यांच्या या पथकाने केली.