पळसंब सरपंच चंद्रकांत गोलतकर यांच्या उपस्थितीत सोहळा संपन्न.

चिंदर | विवेक परब : महाराष्ट्र ज्ञान महामंडळ म्हणजेच MKCL यांचे अधिकृत प्रशिक्षण केंद्र राजसी कॉम्पुटर एज्युकेशन श्रावण यांच्यामार्फत ५ वी ते ९ च्या शालेय विद्यार्थ्यांसाठी MOM ही परीक्षा शालेय अभ्यासक्रमावर आधारित online पद्धतीने घेण्यात आली. संपूर्ण महाराष्ट्रातील MKCL च्या अधिकृत प्रशिक्षण केंद्रावर ही परीक्षा घेतली गेली. या परिक्षेसाठी राजसी कॉम्पुटर एज्युकेशन येथे स्थानिक विद्यार्थ्यांनी चांगला प्रतिसाद देऊन चांगले यशही मिळवले. सिंधुदुर्ग जिल्ह्यात इ. ५ वी मधून कु. सोहम नारायण राऊत यांनी प्रथम पारितोषिक पटकावले . तसेच इ. ६ वी मधुन कु. तन्मय सुनिल राऊत हा द्वितीय क्रमांकाने उत्तीर्ण झाला. इ सातवी मधून कु. वेदांत उल्हास सावंत व वेदांत रामप्रसाद पळसंबकर हे अनुक्रमे द्वितीय व तृतीय क्रमांकाने उत्तीर्ण झाले. सर्व यशस्वी विद्यार्थ्यांचे राजसी कॉम्पुटर एज्युकेशनतर्फेही अभिनंदन करण्यात आले.

या स्पर्धेचे बक्षिस वितरण सरपंच श्री. चंद्रकांत गोलतकर, अंगणवाडी सेविका निकिता पुजारे, राजसी कॉम्पुटर संचालक सौ. माधवी परब, अनुजा राऊत, वृषाली पुजारे यांच्या उपस्थितीत संपन्न झाले.

या बक्षिस वितरणानंतर पळसंब सरपंच चंद्रकांत गोलतकर यांनी माध्यमांशी बोलताना सांगितले की सिंधुदुर्ग जिल्ह्यातील स्थानिक शालेय विद्यार्थी वर्ग हा संगणक व तंत्रज्ञानात प्रगती करत आहेत हे कौतुकास्पद आहे. राजसी काॅम्प्युटर एज्युकेशन सेंटर सारख्या तंत्र शैक्षणिक संस्था ग्रामीण भागात त्यांचे काम करुन सरकारच्या विविध प्रकल्पांना चांगले सहकार्य करत आहेत ही गोष्ट उल्लेखनीय आहे.

यात यशस्वी विद्यार्थी व त्यांच्या पालकांना पळसंब सरपंच चंद्रकांत गोलतकर यांनी पुढील वाटचालीसाठी शुभेच्छा दिल्या.