चिंदर | विवेक परब : सिंधुदुर्ग जिल्ह्यातील वेंगुर्ले नगरपरिषदेचे पवनपुत्र भाजी मार्केटचे बांधकाम पूर्ण झाले तरी अद्याप त्या भाजी मंडईचे उद्घाटन झाले नसल्याने किरकोळ व्यापारी व भाजी विक्रेते यांना नाहक त्रास सहन करावा लागत आहे .

एप्रिल व मे महिन्यात आंबा , फणस व फळांचा मोसम असल्यामुळे किरकोळ व्यापार्यांना भाजी मार्केट बंद असल्यामुळे उन्हात रस्त्याच्या कडेला बसावे लागत आहे .
तसेच विक्रेते रस्त्यावर बसत असल्यामुळे वाहन धारकांना ट्राफीकचा त्रास होत आहे . अशा पद्धतीने भाजी मार्केट सुरू न झाल्यामुळे सर्वसामान्य नागरिकांना वहातूक कोंडीचा त्रास सहन करावा लागत आहे .

ही अडचण लक्षात घेऊन , तसेच भाजी विक्रेते व किरकोळ व्यापारी यांनी भाजपा पदाधिकारी व लोकप्रतिनिधी यांची भेट घेऊन आपल्या समस्या मांडल्या असता भाजपा शिष्टमंडळाने आज वेंगुर्ले नगरपरिषदेत जाऊन मुख्याधिकारी अनुपस्थित असल्यामुळे कार्यालयीन अधिक्षक संगीता कुबल यांची भेट घेऊन मागण्यांचे निवेदन दिले . तसेच येत्या आठ दिवसात पवनपुत्र भाजी मार्केट व्यापारासाठी खुले करावे अशी आग्रही मागणी केली . तसेच प्रशासनाने हे मार्केट व्यापारासाठी खुले न केल्यास भाजी विक्रेते व किरकोळ व्यापार्यांना सोबत घेऊन भाजपा हे मार्केट सुरू करेल असा इशारा भाजपा शिष्टमंडळाने नगरपालिका प्रशासनास दिला .