लहान मुलांच्या शिबिराचा बहाणा सांगून घेतली जातेय माहिती

संशयित व्यक्ती आढळल्यास पोलिसांशी संपर्क साधण्याचे आवाहन

मालवण | वैभव माणगांवकर : परजिल्ह्यातून तरुण, तरुणीची टोळी सर्वत्र खोटा बहाणा सांगून फिरत आहे. लहान मुलांच्या आरोग्य शिबीराचे आयोजन केले आहे असे सांगून घरातील लहान मुलांची नावे तसेच अन्य माहिती घेण्याच्या हेतूने ही टोळी तालुक्यात सक्रिय आहे. प्रत्यक्षात अशी कोणतीही आरोग्य शिबीर नसल्याची माहिती मिळाली आहे. त्यामुळे अश्या संशयास्पद व्यक्ती आढळल्यास नागरिकांनी तात्काळ पोलीस ठाण्याशी संपर्क साधावा.
गेले काही दिवस तरुण व तरुणी शहरातील विविध कॉम्प्लेक्स अन्य घराघरात जात लहान मुलांसाठी आरोग्य शिबिराचे आयोजन केले असून त्यासाठी मुलांची नावे तसेच अन्य माहिती घेत आहेत. यात त्यांच्याकडून शहरातील प्रतिष्ठित डॉक्टरांची नावे सांगितली जात आहेत. नागरिकांनी आयडीकार्ड विचारले असता आयडी कार्ड बनवायला दिले आहे असं सांगण्यात आले. काहींनी संबंधित डॉक्टराना संपर्क केला असता त्या भुरट्यानी तिथून काढता पाय घेतला. त्यामुळे ही टोळी फसवण्याच्या उद्देशाने फिरत असल्याचा संशय बळावला आहे.त्यामुळे नागरिकांनी सतर्क राहून अशी टोळी किंवा व्यक्ती घरी आरोग्य शिबिराचे कारण सांगून आल्यास पूर्ण शहानिशा करून तात्काळ पोलिस ठाण्याशी संपर्क साधावा.