मडूरेत संजिवनी ग्रामसंघातर्फे महिला दिन संपन्न.

बांदा : राकेश परब : महिलांनी आर्थिक सक्षम होण्यासाठी प्रयत्न करणे आवश्यक आहे. बचतगटाच्या माध्यमातून महिलांनी व्यवसाय करण्यासाठी पुढे येणे गरजेचे आहे. महिलांवरील अत्याचार, कायदे, हक्क याबाबत महिलांनी सजग असावे. मुली सुशिक्षित होण्यासाठी महिलांनी पुढाकार घेतला पाहिजे, असे प्रतिपादन अँड. नम्रता नेवगी यांनी मडुरा येथे केले.

मडुरा येथील संजिवनी ग्रामसंघाच्या वतीने जागतिक महिला दिन आयोजित करण्यात आला होता. कार्यक्रमाचे उद्घाटन मान्यवरांच्या हस्ते दीपप्रज्वलनाने करण्यात आले. यावेळी अॅड. नम्रता नेवगी, मडुरा सरपंच साक्षी तोरसकर, संजिवनी ग्रामसंघाच्या अध्यक्षा तन्वी परब, मडुरा आरोग्य उपकेंद्राच्या डॉ. तेजस्विनी माजगावकर, अंगणवाडी सेविका पल्लवी परब आदी उपस्थित होते.
यावेळी डॉ. माजगावकर म्हणाल्या, दैनंदिन कामाच्या व्यापात महिला आरोग्याकडे दुर्लक्ष करतात. दुर्लक्ष केल्यास आजार बळावण्याचा धोका असतो. महिलांनी आरोग्याबाबत सजग राहिले पाहिजे. कोणतीही गंभीर समस्या असल्यास डॉक्टरांशी बोलून आवश्यक चाचण्या करुन त्वरीत उपचार घेतले पाहिजेत असे आवाहन केले.

यावेळी अध्यक्ष तन्वी परब यांनी उपस्थित मान्यवरांचे स्वागत केले. प्रास्ताविकात संजिवनी ग्रामसंघाच्या विविध उपक्रमांची माहिती दिली. यावेळी महिलांसाठी समुह गीते, डान्स, वक्तृत्व व कविता वाचन यासारख्या सांस्कृतिक कार्यक्रमांचे आयोजन करण्यात आले होते. कार्यक्रमाचे सुत्रसंचलन प्रतिक्षा शेट्ये यांनी केले. कार्यक्रमाला ग्रामसंघाचे सर्व पदाधिकारी, कॅडर व सर्व समुहांच्या महिला प्रतिनिधी उपस्थित होत्या.