चिंदर | विवेक परब : सिंधुदुर्ग जिल्हा युवा सेना जिल्हाप्रमुख पदी निवड झाल्यावर व सिंधुदुर्ग जिल्हा बँकेवर संचालक म्हणून निवडून आल्यानंतर कणकवली नगरपंचायतचे नगरसेवक सुशांत नाईक यांनी मुंबईत युवासेना प्रमुख व राज्याचे पर्यावरण मंत्री आदित्य ठाकरे यांची भेट घेतली. यावेळी आदित्य ठाकरे यांनी युवा सेना जिल्हाप्रमुख म्हणून निवड झाल्याबद्दल व जिल्हा बँक संचालक पदी मोठ्या मताधिक्याने निवडून आल्याबद्दल सुशांत नाईक यांचे अभिनंदन करत शुभेच्छा दिल्या. यावेळी सुशांत नाईक यांच्यासोबत आमदार वैभव नाईक, शिवसेना नेते संदेश पारकर उपस्थित होते.तसेच युवासेनेच्या जिल्हाप्रमुख पदी नियुक्ती झाल्यानंतर सुशांत नाईक यांच्याकडून सिंधुदुर्ग जिल्ह्यात युवा सैनिकांचे संघटन करून शिवसेना पक्ष वाढीच्या दृष्टीने सुरु असलेल्या उपक्रमांचे आदित्य ठाकरे यांनी कौतुक केले. सिंधुदुर्ग जिल्ह्यात येत्या काळात सर्व सत्तास्थाने शिवसेनेकडे आली पाहिजे त्यासाठी काम सुरू करा असा कार्य आदेश त्यांना दिला. मुख्यमंत्री उद्धव ठाकरे यांचे कोकण व सिंधुदुर्गावर विशेष प्रेम असून जनतेच्या अडिअडचणी सोडविण्यासाठी शिवसेना यापूर्वीही अग्रेसर होती व यापुढेही राहील अशी हमी देखील आदित्य ठाकरे यांनी यावेळी दिल्याचे सुशांत नाईक यांनी सांगितले. ही भेट सिंधुदुर्ग जिल्ह्यासाठी व युवासेनेसाठी सकारात्मक ठरल्याचे युवासेनेच्या कार्यकर्त्यांनी स्पष्ट केले आहे.