कातवड येथे रानभाजी महोत्सवाचे उदघाटन

मसुरे | झुंजार पेडणेकर : महाराष्ट्र शासन कृषी विभाग व कृषी तंत्रज्ञान व्यवस्थापन यंत्रणा (आत्मा) अंतर्गत मौजे कातवड येथील जिल्हा परिषद शाळा नंबर १ येथे रानभाजी महोत्सवाचे आयोजित करण्यात आले. मालवण तहसीलदार अजय पाटणे यांनी कोरोनाच्या काळातही लोकांमध्ये जनजागृती होण्यासाठी रानभाजी महोत्सवाचे नीटनेटके आयोजन केल्याबद्दल कृषी विभागाचे कौतुक केले. मान्यवरांनी रानभाजी प्रदर्शनाची पाहणी केली. तसेच तालुक्यातील बारा महिला बचत गटांनी मांडलेल्या विविध पाककलाकृतींची पाहणी केली व सहभागी गटांना प्रमाणपत्राचे वितरण केले.
यावेळी गटविकास अधिकारी श्री जयेंद्र जाधव यांनी शेती विकासाची संकल्पना उपस्थितांपुढे मांडली. मालवण तालुक्यातील कृषी विभाग नेहमीच नाविन्यपूर्ण उपक्रम राबविण्यासाठी कार्यतत्पर असतो. अशाच प्रकारचे कार्यक्रम त्यानी आयोजित करावेत, त्यास पदाधिकारी म्हणून आमचे नेहमीच सहकार्य लाभेल असे प्रतिपादन जिल्हा परिषद सदस्य हरी खोबरेकर यांनी केले.
महोत्सवादरम्यान रानभाज्यांचे आहारातील महत्व व संवर्धन या विषयावर कृषी विज्ञान केंद्र किर्लोसचे विषय विशेषज्ञ डॉ. विलास सावंत यांनी मार्गदर्शन केले तर धन्वंतरी संस्था आंबडोसचे वैद्य संदीप तळगावकर यांनी औषधी वनस्पतींची माहिती दिली. कार्यक्रम यशस्वी करण्यासाठी तालुक्यातून दर्जेदार रानभाज्यांचे नमुने गोळा करण्यासाठी आचरा मंडळ कृषी अधिकारी अजित गवंडे, कृषी पर्यवेक्षक श्री सिताराम परब, कृषी सहाय्यक अमृता भोगले, विद्या कुबल, पवन सौंगडे, मिलिंद कदम, सुशीलकुमार शिंदे आदी कृषी विभागाच्या कर्मचाऱ्यांनी तसेच सुरेश परब, सुजय घाडी, वैभव नाईक, अनिल सुकाळी, शिवराम चव्हाण, काशिनाथ चव्हाण, प्रभाकर सावंत यांनी विशेष परिश्रम घेतले. यावेळी तालुका कृषी अधिकारी विश्वनाथ गोसावी, सरपंच उदय नाईक, माजी सभापती मनीषा वराडकर, आत्मा समिती अध्यक्ष उदय दुखंडे, आत्मा समिती सदस्य भाग्यश्री चव्हाण, उज्वला दळवी, गीता चौकेकर, ग्रामसेवक सौ युती चव्हाण, सहाय्यक तंत्रज्ञान व्यवस्थापक निलेश गोसावी उपस्थित होते. ग्रामपंचायत कातवड व पंचक्रोशीतील महिला पुरुष शेतकऱ्यांनी मोठ्या संख्येने सहभाग घेऊन प्रदर्शन यशस्वी केल्याबद्दल मालवण तालुका कृषी अधिकारी विश्वनाथ गोसावी यांनी आभार व्यक्त केले. प्रस्तावीक मंडळ कृषी अधिकारी अतुल कांबळे यांनी केले तर सूत्रसंचालन धनंजय गावडे यांनी केले.