सिंधुदुर्गनगरी | प्रतिनिधी : राष्ट्रध्वजाचा योग्य तो मान राखला जावा, तसेच त्याचा अपमान होऊ नये, यासाठी दक्षता म्हणून प्लास्टिकच्या राष्ट्रध्वजाचा वापर करू नये असे आवाहन निवासी उपजिल्हाधिकारी शुभांगी साठे यांनी केली आहे.
स्थानिक पातळीवर नागरिकांनी तसेच शाळा व कनिष्ठ महाविद्यालये तसेच जिल्हा, तालुका, ग्रामपपंचायत, आरोग्य केंद्र अशा शासकीय-निमशासकीय यंत्रणा व स्थानिक पोलीस यंत्रणा यांनी प्लास्टिक ध्वजाचा वापर होणार नाही याची दक्षता घेण्याचे आवाहन शुभांगी साठे यांनी केले आहे. तसेच कार्यक्रमानंतर रस्त्यावर किंवा लोकवस्ती च्या ठिकाणी जमिनीवर पडलेले राष्ट्रध्वज योग्य तो मान राखून ध्वजसहितेतील तरतुदीनुसार नष्ट करण्याचे आवाहनही त्यांनी केले आहे. येत्या १५ ऑगस्ट ला स्वातंत्र दिन समारंभ जिल्ह्यातील विविध शासकीय, निमशासकीय तसेच खाजगी संस्थांमार्फत ध्वजारोहणाने साजरा होणार आहे. रस्त्यात पडलेले व विखुरलेले राष्ट्रध्वज प्लास्टिकचे असतील तर ते बरेच दिवस नष्ट होत नसल्याने ते त्याच ठिकाणी पडलेले आढळतात. ही बाब राष्ट्र प्रतिष्ठेच्या दृष्टीने गंभीर असल्याने राष्ट्र ध्वजाकरिता प्लास्टिकच्या वापरास मान्यता नाही. योग्य तो मान राखून कागदी ध्वजाचा वापर करणे आवश्यक आहे. तसेच असे राष्ट्रध्वज रस्त्यावर व अन्य ठिकाणी फेकून देऊ नये. ते खराब झाले असल्यास ध्वजसंहीतेतील तरतुदीनुसार नष्ट करण्यात यावेत, असे आवाहनही निवासी उपजिल्हाधिकारी शुभांगी साठे यांनी केले आहेत.