निवडणूक पक्षनिरीक्षक पदी समीर नलावडे.

कणकवली / उमेश परब – कणकवली नगरपंचायत निवडणुकीत समोर तगडे प्रतिस्पर्धी असताना एक हाती सत्ता आणून सर्वांनाच धक्का देणारे कणकवली नगरपंचायत नगराध्यक्ष समीर नलावडे यांची देवगड जामसंडे नगरपंचायत निवडणूकीत पक्षनिरीक्षक म्हणून नेमणूक करण्यात आली आहे. नेहमीच आगळी वेगळी योजना आखून विरोधकांना धूळ चारणाऱ्या कणकवली देवगड मतदार संघाचे आमदार नितेश राणे यांची ही उपयुक्त खेळी असल्याची सर्वत्र चर्चा आहे. कणकवली नगरपंचायत निवडणुकीत थेट नगराध्यक्ष पदासाठी समीर नलावडे यांच्या समोर तगडे उमेदवार उभे होते. सर्व पक्ष तसेच गाव पॅनल यामुळे मत विभागणी अपेक्षित होती मात्र समीर नलावडे यांनी न डगमगता विरोधक म्हणून उभे ठाकलेल्या तगड्या उमेदवारांचा पराभव करत कणकवली नगरपंचायतची सत्ता पुन्हा एकदा नारायण राणे यांच्या विचारांची बनवली. समीर नलावडे यांनी आपल्या सोबतचे जुने व नवखे उमेदवार यांच्या विजयासाठी अथक मेहनत घेतली त्या सोबत राजकीय रणनीती आखत एक हाती सत्ता स्थापन केली. हाच कणकवली पॅटर्न देवगड जामसंडे नगरपंचायत निवडणुकीत वापरण्यात यावा यासाठी आमदार नितेश राणे यांनी नगराध्यक्ष समीर नलावडे यांची नियुक्ती केली आहे. देवगड जामसंडे नगरपंचायत ही सध्या भाजपच्या ताब्यात आहे मात्र यावेळी कोणतीही जोखीम न घेता १७ पैकी १७ उमेदवार निवडून आणावे या हेतूने आमदार नितेश राणे यांनी निवडणुकीची जबाबदारी समीर नलावडे यांच्याकडे सोपविली आहे. आणि ह्या निवडणुकीत पुन्हा एकदा भाजप विजयी होईल असा विश्वास वर्तविला आहे.