कणकवली | उमेश परब | ( ब्युरो चीफ सिंधुदुर्ग ): दिवाळीनंतर सर्वत्र आनंदात साजरा होणारा सण म्हणजे तुलसी विवाह..! कार्तिक शुद्ध द्वादशी दिवशी तुलसी वृंदावनाची सजावट करून पारंपरिक पद्धतीने अगदी भक्ती भावाने पूजन करून विवाह सोहळा पार पडला जातो गेली दोन वर्षे कोरोनाच्या प्रादुर्भावामुळे अगदी घरगुती पद्धतीत तुलसी विवाह सोहळा पार पडला होता. या वर्षी कोरोनाचे नियम काही प्रमाणात शिथिल झाल्यानंतर तुलसी विवाह आनंदात साजरा करण्याच्या तयारीत असलेल्या जिल्हावासीयांच्या आनंदावर पावसाने पाणी फेरले आहे. सिंधुदुर्ग जिल्ह्यात दोन दिवस अगोदर तुलसी विवाहाची तयारी केली जाते. यात अंगणाचे सारवण, तुलसी रुंदावन धुवून स्वच्छ करून त्यावर रंगरंगोटी केली जाते. तुलसी विवाहाच्या दिवशी रांगोळी काढून अगदी जय्यद तयारी केली जाते. या वर्षी ही अगदी उत्साहात हा विवाह सोहळा पार पाडण्यासाठी जिल्हावासीय सज्ज असतानाच पावसाने आपल्या अक्षता तुलसी रुंदावनावर टाकून सर्व प्रयत्नांवर पाणी फेरले आहे. तब्बल दोन वर्षानंतर तुलसी विवाह सोहळा आनंदात साजरा करण्याचा जिल्हावासीयांचा मनसुबा पाण्यात वाहून गेला आहे. यंदा सिंधुदुर्ग जिल्ह्यातील सणवार,शेती आणि सांस्कृतिक परंपरा यावर नैसर्गिक अनिश्चिततेचे सावट राहीले आहे. तुलसी विवाहाचे पारंपारिक व सांस्कृतिक समाधान मिळण्यापासून वंचित राहिल्याने सामान्य जिल्हावासियांची नक्कीच हिरमुसलेपणाची भावना व्यक्त होत आहे. तुलसी विवाहावर आजच्या पावसाच्या अक्षता हुरहूर लावून गेल्यात असाही बहुतांश जणांचा सूर आहे.