पाचव्या दक्षिण आशियाई जिमनॅस्टीक स्पर्धा

मूळ चिपळुणचा निशांत “विन दा” करंदीकर ठरला सुपर मेडलिस्ट…!

मसुरे | सौ.प्राजक्ता पेडणेकर : बांगलादेश येथे नुकत्याच पार पडलेल्या पाचव्या मध्य-आशियाई जिमनॅस्टीक स्पर्धेत मूळ चिपळूण येथील जिमनॅस्ट निशांत करंदीकरने दोन रौप्य पदकासह चार पदके प्राप्त केली आहेत. तसेच याच स्पर्धेत मुंबईच्या आयुष खामकरने दोन पदके जिंकून यश संपादन केले आहे. निशांत करंदीकर हा खेळाडू विलेपार्ले येथील प्रबोधनकार ठाकरे क्रीडा संकुलाचा विद्यार्थी आहे. निशांत करंदीकरने पॅरलल ब्रास प्रकारात वैयक्तिक तसेच सांघिक रौप्य पदक जिंकले आहे. त्याचप्रमाणे रोम रिंग्ज प्रकारात वैयक्तिक सर्वांगिण क्रमवारीत तिसरे स्थान मिळवून ब्राँझ पदक प्राप्त केले आहे. आयुषने पॅरलल बार्स तसेच टेबल व्हाॅल्टमध्ये वैयक्तिक ब्राँझ पदक जिंकले आहे.
जिमनॅस्ट निशांत करंदीकरला निष्णात प्रशिक्षक शुभम गिरी यांचे सर्वोत्कृष्ट मार्गदर्शन लाभले. विलेपार्ले येथील प्रबोधनकार ठाकरे क्रीडा संकुलाचे अध्यक्ष अरविंद प्रभू, सचिव डॉ. मोहन राणे तसेच इतरही प्रशिक्षक यांचे सुयोग्य मार्गदर्शन व प्रेरणादायी सहकार्य खेळाडूना वेळोवेळी मिळत असते. प्रबोधनकार ठाकरे क्रीडा संकुलाचे प्रशिक्षक व पदाधिकारी यांच्या कौतुकास्पद प्रोत्साहन व मार्गदर्शनामुळे अनेक खेळाडू राष्ट्रीय तसेच आंतरराष्ट्रीय पातळीवर क्रीडा क्षेत्रात विजय संपादन करत आहेत.