माऊली महिला मंडळ शिरोडा संचलित कर्णबधिर व मतिमंद निवासी विद्यालयात पिकल बाॅल खेळाचे प्रशिक्षण.

उद्योजक व पिकल बाॅल प्रशिक्षक सौ. वैदेही गुप्ते यांच्या माध्यमातून सुरू झालेल्या क्रीडा उपक्रमाची होत आहे प्रशंसा. 

सिंधुदुर्ग : मुंबईतील नोवा क्यूरो नॅचरल्स कंपनीच्या प्रवर्तक आणि जनुकीय संशोधक व पोषण तज्ञ सौ. वैदेही गुप्ते ह्यांची सिंधुदुर्ग जिल्ह्यात पिकल बाॅलचा प्रसार व्हावा अशी आत्यंतिक इच्छा होती. यासाठी त्यांना श्री. अरविंद प्रभू, श्री. चेतन सनिल तसंच सावंतवाडी संस्थानचे युवराज श्री. लखमराजे भोसले यांचा प्रोत्साहक पुढाकार देखिल लाभत आहे.

या दरम्यान वैदेही गुप्ते यांचा संपर्क, सावंतवाडी तालुक्यातल्या आरोस, दांडेली येथील माऊली महिला मंडळ शिरोडा संचलित माऊली कर्णबधिर व मतिमंद निवासी विद्यालय प्रशालेच्या संस्थापक अध्यक्ष आणि सिंधुदुर्ग जिल्ह्यातील ज्येष्ठ समाजसेविका रेखाताई गायकवाड यांच्याशी झाला. सौ. वैदेही ह्यांनी तिथल्या कर्णबधिर व मतिमंद मुलांना पिकल बाॅलचे रितसर प्रशिक्षण आणि पिकल बाॅल च्या जगाची ओळख करुन द्यायचा निर्णय घेतला. १५ ऑक्टोबर २०२५ रोजी मुलांना वैदेही गुप्ते यांच्या मार्गदर्शनाखाली पिकल बाॅल खेळाच्या प्रशिक्षणाचा श्रीगणेशा करण्यात आला. इथल्या मुलांसाठी सौ. वैदेही गुप्ते यांनी प्रशालेचे मुख्याध्यापक, शिक्षक व सहकारी कर्मचारी यांच्या सहयोगाने एक विशिष्ट प्रशिक्षण पद्धती आखलेली आहे. जिल्ह्यात इतरत्रही 'पिकल बाॅल' चा मानस यावेळी सौ. वैदेही गुप्ते यांनी व्यक्त केला आणि या खेळातून रोजगार निर्मिती बद्दलही विशेष माहिती दिली.

यावेळी सौ. वैदेही गुप्ते यांच्या सह माऊली महिला मंडळ शिरोडा संचलित माऊली कर्णबधिर व मतिमंद निवासी विद्यालय संस्थापक अध्यक्ष रेखाताई गायकवाड, प्रशालेचे मुख्याध्यापक, शिक्षक, शिक्षकेतर कर्मचारी व सहकारी आणि हीतचिंतक उपस्थित होते.