व्यापारी महासंघ व पर्यटन व्यावसायिक दरम्यान सकारात्मक चर्चा.

मालवण | ब्यूरो न्यूज : सिंधुदुर्ग जिल्ह्यात सागरी किनारपट्टीवरील पावसाळी पर्यटनाकडे विशेष लक्ष केंद्रित करण्यात येत आहे. सिंधुदुर्ग जिल्हा व्यापारी महासंघाने पर्यटन व्यवसायिकांच्या साथीने पावसाळी पर्यटनाला प्रोत्साहन देत विविध उपक्रम राबवण्याचा निर्णय घेतला आहे. येथील पर्यटन बारमाही सुरु राहण्याच्यादृष्टीने पावसाळी पर्यटन ही काळाची गरज आहे. त्या दृष्टीने महासंघाने पुढाकार घेतला असल्याचे व्यापारी महासंघाचे कार्यवाह नितीन वाळके यांनी सांगितले.

दरम्यान, पालकमंत्री नितेश राणे यांनी दिलेल्या सूचनेनुसार महासंघ तयार करीत असलेल्या सिंधुदुर्गाच्या व्यापार धोरणात समाविष्ट करावयाच्या पर्यटन व्यवसाय विषयक बाबींवरही महासंघ व पर्यटन व्यावसायिक यांच्यात सकारात्मक चर्चा झाली, नितीन वाळके यांनी सांगितले.

मालवण येथील हॉटेल चैतन्य मध्ये आयोजित पत्रकार परिषदेत नितीन वाळके बोलत होते. यावेळी मालवण व्यापारी संघांचे अध्यक्ष उमेश नेरुरकर, मालवण तालुका व्यापारी संघाचे अध्यक्ष प्रमोद ओरसकर, बाळू अंधारी, गणेश प्रभुलकर, हर्षल बांदेकर आदी उपस्थित होते.

यंदाच्या पर्यटन हंगामाच्या शेवटच्या टप्प्यात मे महिन्यात कोसळलेल्या अवकाळी पावसामुळे मालवणसह सिंधुदुर्ग जिल्ह्यातील पर्यटन व्यवसाय व या व्यवसायावर अवलंबून असणाऱ्या घटकांचेही मोठ्या प्रमाणावर आर्थिक नुकसान झाले. पर्यटन व्यावसायिकांसाठी मे महिना हा पुढील पावसाळ्याच्या काळासाठी बेगमीचा काळ असतो. पावसाळ्याचे तीन महिने पर्यटन बंद असते. याचा विचार करता पावसाळा कालावधीत निसर्गाने मुक्त उधळण केलेली अनेक ठिकाणे पर्यटकांनी गजबजून जावीत या दृष्टीने प्रयत्न सुरु करण्यात आले आहेत.

यावेळी नितीन वाळके म्हणाले, सिंधुदुर्ग जिल्ह्यात मे महिन्यात झालेल्या अवकाळी पावसामुळे पर्यटन व्यवसायिक, मच्छिमार, आंबा व्यावसायिक, व्यापारी यांसह इतर व्यवसायिकांवर आर्थिक संकट कोसळले. या नुकसानीचे परिणाम गणेश चतुर्थी काळात निश्चित पहायला मिळतील. कारण मे महिना हा या व्यवसायांसाठी बेगमीचा काळ असतो. हंगामातील ५० टक्के उलाढाल १५ एप्रिल ते १५ जून या दोन महिन्याच्या काळात होते. पर्यटनाच्या दृष्टीने हा अतिशय महत्वाचा काळ आहे. मात्र मे महिन्यात पाऊस पडल्याने येथील समुद्री पर्यटन, किल्ला होडी सेवा व इतर पर्यटन व्यवसाय ठप्प झाले. वर्षातील पावसाचे तीन महिने पर्यटन बंद असताना अशा नैसर्गिक आपत्तीमुळेही पर्यटन व्यवसायाचे नुकसान होत आहे. त्यामुळे आता पावसाळी पर्यटन विकसित होणे गरजेचे आहे. यासाठी जिल्हा व्यापारी संघाने जिल्ह्यातील पर्यटन व्यवसायिकांची बैठक घेऊन पावसाळी पर्यटनासाठी काय काय करता येईल, कोणते उपक्रम घेता येतील यावर चर्चा करून तातडीच्या उपाययोजना व दीर्घकालीन उपाययोजना ठरविण्यात आल्या. याची अंमलबजावणी लवकरच सुरु करण्यात येणार आहे, नितीन वाळके म्हणाले.