मालवण | प्रतिनिधी : सिंधुदुर्ग जिल्हा व्यापारी महासंघाच्या पुढाकाराने सिंधुदुर्ग जिल्ह्यातील पर्यटन क्षेत्रात कार्यरत असलेल्या सर्व संघटनांचे पदाधिकारी व पर्यटन व्यावसायिकांची खुली सभा मंगळवार, १० जून २०२५ रोजी सायंकाळी ३:५९ ते ६:०० या वेळेत मालवण, धुरीवाडा येथील संस्कार सभागृहात आयोजित करण्यात आली आहे.

व्यापारी महासंघाचे अध्यक्ष प्रसाद पारकर यांच्या अध्यक्षतेखाली ही बैठक संपन्न होणार आहे. या सभेत सिंधुदुर्ग जिल्ह्यातील पावसाळी पर्यटन वाढीसाठी आवश्यक उपाययोजनांची रुपरेषा आखून अंमलबजावणीसाठी कालबद्ध कृती कार्यक्रम ठरवणे व त्यानुसार जबाबदाऱ्यांचे वाटप करणे तसेच पालकमंत्री नितेश राणे यांच्या सूचनेनुसार महासंघ तयार करत असलेल्या जिल्ह्याच्या व्यापार धोरणात समाविष्ट करावयाच्या पर्यटन व्यवसाय विषयक बाबींवर निर्णय घेणे या विषयांवर चर्चा होणार आहे.

सभा वेळेत सुरू होईल व वेळेत संपेल. त्यामुळे सर्वांनी वेळेपूर्वी उपस्थित राहावे. सभेत फक्त पावसाळी पर्यटन व्यवसाय वाढीसाठीचे उपाय मांडायचे आहेत. वैयक्तिक व्यावसायिकांना प्रत्येकी दोन मिनिटांचा वेळ देण्यात येईल. प्रत्येक संघटनेच्या वतीने फक्त एका पदाधिकाऱ्याला बोलण्याची संधी मिळेल व त्याला एकूण पाच मिनिटांचा वेळ दिला जाईल. सभेचे कामकाज नियोजितरित्या संपन्न होण्यासाठी सर्वांनी वरील नियम पाळावे व सर्व पर्यटन व्यावसायिकांनी उपस्थित राहून सभेच्या कामकाजात सहभागी व्हावे, आवाहन व्यापारी महासंघाचे कार्यवाह नितीन वाळके यांनी केले आहे.