मालवण पोलिसांची तत्परता व सुजाण नागरीकांच्या प्रामाणिकपणा बद्दल बॅग मालकाने मानले आभार.

मालवण | प्रतिनिधी : दिनांक ५ जानेवारी रोजी सायंकाळी ६ वा.च्या सुमारास इव्हिनिंग वॉक साठी जाणाऱ्या श्रद्धा सुंदर बांदेकर ( वय ६१, राहणार कोळंब ) मधली वाडी यांना हडकर स्टॉप नजीकच्या गॅरेज समोरील रस्त्यावर एक छोटी पाउच वजा बॅग पडलेली दिसली. ती बॅग त्यांनी तिथे जवळ असलेले गॅरेज मेकॅनिक सतीश पवार यांना दाखवली. दोघांनी बॅग उघडुन बघितली असता त्या बॅगमध्ये बरेच पैसे आणि दोन मौल्यवान घड्याळे असलेली दिसली. त्यांनी ही बॅग एका जबाबदार नागरिकाप्रमाणे पोलिस स्टेशनला नेऊन देऊया असे ठरवले आणि प्रामाणिकपणे मालवण पोलीस ठाणे येथे आणून जमा केली.

त्यानंतर ठाणे अंमलदार गणेश शिंदे यांनी सदर हकिगत तात्काळ पोलिस निरीक्षक कोल्हे यांना कळवली. मालवण पोलीस निरीक्षक श्री प्रवीण कोल्हे यांनी आपल्या स्टाफला सदर बॅग मालकाचा शोध घेण्याचे तात्काळ आदेश दिले. त्यावरून सहाय्यक पोलीस निरीक्षक श्री .माने , पी एस आय संदीप खाडे, पी एस आय आनंद यशवंते सहाय्यक पोलीस उपनिरीक्षक हेमंत पेडणेकर ,पोलीस हवालदार सुशांत पवार, पोलीस कॉन्स्टेबल गुहाडे, यांच्या पथकाने तात्काळ तपासाची सूत्रे हलवून सदर बॅग ची कसून तपासणी केली. तेव्हा त्या बॅगमध्ये रोख रूपये ९५.००० ( पंच्चाण्णव हजार रुपये) तसेच सुमारे ७५.००० ( पंच्चाहत्तर हजार) रूपये किंमतीची दोन घड्याळे व इतर किरकोळ वस्तू सापडून आल्या.

ही बॅग अधिक तपासून पहाता त्यात बर्डोली, राज्य गुजरात येथे पेट्रोल पंपावर पेट्रोल भरले असल्याची पावती आढळून आली. त्याद्वारे पोलिस हवालदार सुशांत पवार यांनी तात्काळ त्यावर नमूद गाडी नंबर MH-04 -JM- 5156 द्वारे सदर गाडी मालकांचा मोबाइल नंबर मिळवला व त्यांनी सदर नंबर वर कॉल केला असता सदर नंबर हा मुंबई येथील जय कापडिया यांचा असल्याचे समजले. पवार यांनी त्यांच्याकडे अधिक चौकशी केली असता त्यांनी आपण मुंबई येथे असून सदर गाडी घेउन त्यांचे वडिल मनोज जसवंतलाल कापडिया हे मालवण येथे कामानिमित्त गेलेले आहेत व रेवंडी येथील माई रिसॉर्टवर थांबलेले आहेत असे सांगितले. पवार यांनी सदर माहिती पोलिस निरीक्षक प्रविण कोल्हे यांना कळविली.

श्री कोल्हे साहेबांनी माई रिसॉर्ट येथे संपर्क करून सदर बॅग मालक यांच्याशी त्यांच्या बॅग बाबत शहानिशा करून बॅग मालक मनोज जसवंतलाल कापडिया यांना पोलिस ठाणे येथे बोलावून घेतले. आणि सदर बॅग ची ओळख पटवून ती बॅग त्यांचीच असल्याची खात्री करून सिंधुदुर्ग पोलिसांच्या माध्यमातून ती बॅग प्रामाणिकपणे परत करणाऱ्या कोळंब येथील सतिश पवार या मेकॅनिकच्या हस्ते मूळ मालकाला परत करण्यात आली.

बॅग मालक मनोज जसवंतलाल कापडिया, मालाड मुंबई यांनी जगात आजही प्रामाणिकपणा शिल्लक असल्याचे त्याचप्रमाणे महाराष्ट्र पोलिसांचा कर्तव्यदक्षपणा अनुभवण्यास मिळाला ही आपल्यासाठी सुखद आणि अभिमानास्पद गोष्ट असल्याचे सांगितले.

तसेच बॅग परत करणाऱ्या श्रद्धा सुंदर बांदेकर रा. कोळंब मधली वाडी, मेकॅनिक सतीश पवार रा. कुंभारमाठ तसेच सिंधुदूर्ग जिल्हा पोलिस अधीक्षक श्री. मा. सौरभ कुमार अग्रवाल यांचे त्याचप्रमाणे मालवण पोलिस स्टेशनचे ऋणी असल्याच्या भावना श्री कापडिया यांनी व्यक्त केल्या.