विविध धार्मिक कार्यक्रमांचे आयोजन ; चेअरमन महेश इंगळे यांची माहिती.

मसुरे | प्रतिनिधी : नूतन वर्षाच्या स्वागताकरीता कोल्हापूर, मुंबई व राज्यातील विविध भागातील स्वामी भक्तांच्या वतीने अक्कलकोट येथील श्री वटवृक्ष स्वामी महाराज देवस्थानात सालाबादाप्रमाणे विविध धार्मिक कार्यक्रमांनी हर्षोल्हासात नुतन वर्षाचे स्वागत होणार असल्याची माहिती मंदिर समितीचे चेअरमन महेश इंगळे यांनी दिली.

श्री महेश इंगळे ( चेअरमन, वटवृक्ष श्री स्वामी महाराज मंदिर समिती, अक्कलकोट )

मंगळवार दिनांक ३१ डिसेंबर रोजी सरत्या वर्षाला निरोप देण्यासाठी व बुधवार दिनांक १ जानेवारी २०२५ रोजी नुतन वर्षाचे स्वागत करण्यासाठी व नविन वर्षाच्या शुभमुहूर्तावर श्री स्वामी समर्थांचे दर्शन घेण्यासाठी कोल्हापूर, मुंबई, पुणे, औरंगाबाद, अहमदनगर, धुळे, नागपूर, नाशिक, रत्नागिरी, सोलापूर, सांगली इत्यादी भागासह राज्याच्या कानाकोपऱ्यातून व देशभराच्या अन्य ठिकाणांहून बरेच स्वामी भक्त येणार आहेत. दिनांक ३१ डिसेंबर २०२४ रोजी दुपारी ३ ते सायंकाळी ७ या वेळेत ओम स्वामी चैतन्य भजनी मंडळ यांचे भजन, व विविधरुपी सोंगी भारूड इत्यादी कार्यक्रम देवस्थान परिसरात होतील. रात्री ७:४५ वाजता महाराजांच्या शेजारतीस सुरुवात होईल. रात्री १० ते पहाटे ४ या वेळेत कोल्हापूर, मुंबई, पुणे येथील भजनी मंडळाचे नविन वर्षाच्या स्वागताचे भजन व भावभक्तीगीतांचा कार्यक्रम देवस्थान व परिसरात होतील. दि: ३१ डिसेंबर रोजी रात्री १२ वाजता कोल्हापूर व मुंबई येथील स्वामी भक्तांच्या वतीने गोड प्रसादाचे पदार्थ वाटप करुन व फटाक्यांची आतषबाजी करुन असंख्य स्वामी भक्तांच्या मुखाने ‘अवधूत चिंतन श्री गुरुदेवदत्त सदगुरु स्वामी समर्थ महाराज की जय’ या जयघोषाने सन २०२५ या नविन वर्षाचे स्वागत केले जाईल. याप्रसंगी उपस्थित सर्व स्वामी भक्त शुभेच्छा व्यक्त करतील व या शुभमुहूर्ताप्रसंगी स्वामींच्या चरणी नतमस्तक होवून येणारे नविन वर्ष सुख समृध्दीने व भरभराटीने व्यतीत व्हावे याकरिता समर्थांच्या चरणी साकडे घालुन पुढील कार्यक्रमास सुरुवात करण्यात येईल. दिनांक १ जानेवारी रोजी सकाळी ८ ते ११ यावेळेत भजन भारूड इत्यादी धार्मिक कार्यक्रम होतील. या प्रसंगी सर्व स्वामी भक्तांच्या सुरक्षिततेकरीता व सर्व स्वामी भक्तांचे दर्शन सुलभतेने होण्याकरीता दिनांक ३१ डिसेंबर व १ जानेवारी रोजी मंदिरात स्वामी भक्तांच्या वतीने नित्यनियमाने होणारे अभिषेक होणार नाहीत. स्वामी भक्तांच्या दर्शनाकरीता देवस्थान विश्वस्त समितीच्या वतीने विशेष नियोजन करण्यात आले आहे.

जास्तीत जास्त भाविकांनी नूतन वर्षानिमीत्त आयोजित या कार्यक्रमांचा लाभ घेवून व नूतन वर्षानिमित्त समर्थांचे दर्शन घेवून स्वामींचे आशीर्वाद प्राप्त करुन घ्यावे असे आवाहन मंदिर विश्वस्त समितीच्या वतीने चेअरमन महेश इंगळे यांनी केले आहे.