मालवण | प्रतिनिधी : सिंधुदुर्ग जिल्ह्यातील मालवण तालुक्यातल्या तळाशील खाडी किनारी छोटी होडी (पात) बुडाली. होडीत तीन जण होते त्यापैकी एकाने पोहत तळाशीलचा किनारा गाठला . मात्र अन्य दोघेजण पाण्यात बेपत्ता झाले. काल शनिवारी ८ जून रोजी रात्री ९ वाजण्याच्या सुमारास अचानक वाढलेल्या वाऱ्या पावसात होडी नदीपात्रात (खाडी) उलटल्याने ही दुर्घटना घडली असल्याचे समजते. बोटीवरील अन्य दोघांचा शोध सुरु आहे.

मालवण पोलिसांनी दिलेल्या महिनानुसार किशोर महादेव चोडणेकर (वय ५५), त्यांचा मुलगा लावण्य किशोर चोडणेकर (वय १४), दोन्ही रा. तळाशील मालवण तसेच धोंडीराज परब (वय ५५) मूळ रा. तारकर्ली हे तिघे काल सायंकाळी उशिरा तळाशील खाडीमध्ये पात (छोटी होडी) घेऊन मच्छीमारीसाठी गेले होते. सर्जेकोट तळाशील समोर होडी असताना असताना रात्री ९ वाजण्याच्या सुमारास अचानक वाढलेल्या पाऊस आणि वाऱ्यामुळे होडी खाडीत उलटल्याने तिघेही जण पाण्यामध्ये पडले.

होडीतून पाण्यात पडलेल्या तिघांपैकी लावण्य किशोर चोडणेकर या मुलाने पोहत पोहत तळाशील किनारा गाठला. आपल्या सोबत असलेले वडील किशोर चोडणेकर व धोंडीराज परब हे दोघेही पाण्यामध्ये बेपत्ता झाल्याचे त्यांनी स्थानिक ग्रामस्थांना सांगितले. पाण्यात बुडालेल्या दोन्ही मच्छिमारांचा शोध सूरू असून रात्रीचा अंधार तसेच पाऊस असल्याने शोध कार्यात अडथळे येत होते. स्थानिक ग्रामस्थ यांच्या सहभागातून सकाळ पासून शोध मोहीम सूरू आहे. याबाबत माहिती मालवण पोलीस निरीक्षक प्रवीण कोल्हे यांनी दिली.