मालवण | प्रतिनिधी : सिंधुदुर्ग जिल्ह्यातील मालवण – कसाल मार्गावरील कुंभारमाठ नजिकच्या आनंदव्हाळ येथे काल १५ मे रोजी रात्री एक दुचाकी आणि एसटी बस यांचा अपघात झाला. या अपघातात दोघांचा मृत्यू झाला असून एकजण गंभीर जखमी झाला आहे. या अपघाताची नोंद मालवण पोलीस ठाण्यात करण्यात आली आहे अशी माहिती मालवण पोलीस निरीक्षक प्रवीण कोल्हे यांनी दिली.

मालवण पोलिसांनी दिलेल्या माहिती नुसार, मालवण कसाल मार्गांवर आनंदव्हाळ भगवती हॉटेल जवळील वळणावर मालवणच्या दिशेने येणाऱ्या रत्नागिरी – मालवण (एमएच २० बी एल ३१८५) या बसला समोरून भरधाव वेगात येणाऱ्या दुचाकी मोटारसायकलची (एम एच ०७ ए क्यू २६५८) ची धडक बसली. एसटी बसला एका बाजूला धडक देऊन मोटरसायकल रस्त्यावर कोसळली. त्या मोटरसायकलवर बसलेले तिघेही जण रस्त्यावर कोसळले. एसटी चालक, वाहक तसेच स्थानिक ग्रामस्थ यांनी तत्काळ धाव घेतली आणि रुग्णावाहिकेला बोलावून रक्ताच्या थारोळ्यात पडलेल्या जखमीना जिल्हा रुग्णालयात नेण्यात आले. मालवण पोलीस व एसटी प्रशासन अधिकारी घटनास्थळी दाखल झाले. अपघाताचा पंचनामा करण्यात आला.

या अपघातात गंभीर जखमी मोटरसायकल चालक गणेश कृष्णा निकम (वय ३० वर्षे ) रा. पोईप यांचा काल बुधवारी रात्री उपचारा दरम्यान मृत्यू झाला. तर अन्य एक गंभीर जखमी राकेश पवार (वय ३० वर्षे) रा. कुंभारमाठ यांचा गुरुवारी सकाळी मृत्यू झाला. सुनील शिवराम पवार (वय २५ वर्षे) रा. कोटकमटे (तालुका देवगड) या जखमी तरुणावर गोवा येथे उपचार सूरू आहेत अशी माहिती मालवण पोलिसांच्या वतीने देण्यात आली आहे.

भरधाव वेगात मोटरसायकल चालवून अपघातात स्वतःच्या मृत्यूस तसेच मोटरसायकल वरील अन्य एका व्यक्तीच्या मृत्यूस व मोटरसायकल वरील अन्य एका व्यक्तीच्या गंभीर दुखापतीस कारणीभूत ठरल्या प्रकरणी मोटरसायकल चालकावर गुन्हा दाखल करण्यात आला आहे. या अपघाता बाबत मालवण पोलीस अधिक तपास करत आहेत.