गुंतवलेली रक्कम ७ पटीने परत करू असे दाखवले होते अमिष..!

रत्नागिरी | ब्यूरो न्यूज : गुंतवलेली रक्कम ७ पटीने प्रॉफिट देउन परतावा मिळेल असे आमिष दाखवून तब्बल ६२ लाख ४६ हजार रुपयांची ऑनलाईन फसवणूक करणार्‍या दोघांच्या शहर पोलिसांनी मुसक्या आवळल्या. फसवणूकीची ही घटना २२ फेब्रुवारी ते २९ एप्रिल २०२३ या कालावधीत घडली होती.

संजय आण्णासाहेब कांबळे (४४, मुळ रा.संगमनेर,अहमदनगर सध्या रा.खेड,पौणे) आणि सोमनाथ चांगदेव सातपुते (४०,मुळ रा.संगमनेर,अहमदनगर सध्या रा.खेड,पुणे) अशी अटक करण्यात आलेल्या दोन संशयितांची नावे आहेत. त्यांच्या विरोधात समीर सुरेश प्रसादे (४२,रा. सिध्दीविनायक नगर, रत्नागिरी) यांनी शहर पोलिस ठाण्यात तक्रार दिली होती.त्यानुसार,संशयितांनी संगनमताने फिर्यादीला वेल्थ पासवर्ड ३१४१ या हॉटसअ‍ॅप ग्रुपवर समाविष्ट करुन घेतले होते. या ग्रुपवर वेब वर्जन अ‍ॅण्ड्रॉईड डाउनलोड ही रजिस्ट्रेशन लिंक पाठवून त्यावर ट्रेडिंग अकाउंट ओपन करण्यास सांगितले. फिर्यादी यांनी त्यांची पत्नी सिया प्रसादे हिचे नावे कंपनीचे ट्रेडिंग अकाउट ओपन केले.

त्यानंतर फिर्यादींनी गुंतवलेली रक्कम ही ७ पटीने प्रॉफिट देउन परतावा दिली जाईल असा प्लॅन त्यांना सांगून त्यांचा विश्वास संपादन केला. नमूद लिंकचा वापर करुन फिर्यादीची पत्नी सिया प्रसादे यांच्या बँक खात्यावरुन आरोपींना युपीआयआयडी आयएमपीएस तसेच सेव्हिंग अकाउंटवर वेळोवेळी असे एकूण ६२ लाख ४६ हजार रुपये ऑनलाईन पध्दतीने ट्रान्सफर केले.परंतु त्यानंतर फिर्यादीला कोणताही परतावा न मिळाल्याने आपली फसवणूक झाल्याचे त्यांच्या लक्षात येताच त्यांनी शहर पोलिस ठाण्यात धाव घेत तक्रार दिली होती. या प्रकरणी तपास करताना शहर पोलिसांनी दोन्ही संशयितांना अटक करुन शुक्रवारी न्यायालयात हजर केले असता न्यायालयाने त्यांची रवानगी २० डिसेंबर पर्यंत पोलिस कोठडीत केली.