मालवण | ब्युरो न्यूज : सिंधुदुर्ग जिल्ह्यातील मालवण तालुक्यातल्या तारकर्ली पर्यटन केंद्रासमोरील समुद्रात उतरलेल्या पर्यटकांपैकी एक पर्यटक बुडून बेपत्ता झाला तर त्याच्या सोबतचा एक युवक गंभीर आहे. त्याला अधिक उपचारासाठी जिल्हा रुग्णालयात हलविण्यात आले आहे. हा अपघात आज ४ वाजण्याच्या दरम्यान घडला. सैफियान दिलदार शेख (वय २४) रा. साकेडी मुस्लिमवाडी कणकवली असे बेपत्ता युवकाचे नांव आहे.

साकेडी मुस्लिमवाडी कणकवली येथील सैफियान दिलदार शेख़, साहिल इरफान शेख़, सावेज रियाज शेख़, अरबाज इम्तियाज शेख़, मतीन बबलू शेख़, कतील नाझीम काझी, उस्मान काझी, युसुफ काझी, साहिल शेख़, ज़ायेद शेख़ हे सर्वजण आज दुपारी दुचाकीने तारकर्ली पर्यटन केंद्र येथे आले होते. सायंकाळी साडेतीन पावणे चार वाजण्याच्या दरम्यान ते समुद्रात उतरले. यात पाण्याचा अंदाज न आल्याने सैफियान शेख़ हा बुडून बेपत्ता झाला तर मतीन शेख़ याला बुडण्यापासून वाचविण्यात आले. त्याला उपचारासाठी रुग्णवाहिकेतून ग्रामीण रुग्णालयात आणण्यात आले. डॉ. शिवप्रसाद तेली, डॉ. पळसंबकर यांनी उपचार केले. मात्र त्याची तब्येत गंभीर बनल्याने त्याला अधिक उपचारासाठी जिल्हा रुग्णालयात हलविण्यात आले आहे.

या घटनेची माहिती मिळताच पोलीस निरीक्षक प्रवीण कोल्हे, पोलिस सुनील जाधव, पोलिस सुभाष शिवगण, पोलिसधोंडू जानकर यांनी ग्रामीण रुग्णालयास भेट देऊन माहिती घेतली.