पाकिस्तानच्या अर्शद नदीमने दिली कडवी टक्कर..!

सुयोग पंडित | क्रिडा : हंगेरी बुडापेस्ट येथे सुरू असलेल्या जागतीक ॲथलेटीक्स खेळात आज भारतासाठी ऐतिहासिक आनंद प्राप्त झाला असून भारतीय गोल्डन बॉय नीरज चोप्राने जागतिक ॲथलेटिक्स चॅम्पियनशिप २०२३ च्या अंतिम फेरीत इतिहास रचला आहे. जागतिक ॲथलेटिक्स चॅम्पियनशिपमध्ये भालाफेकमध्ये सुवर्णपदक जिंकणारा तो पहिला भारतीय खेळाडू ठरला आहे.
भारताच्या या लाडक्या प्रतिभावंत खेळाडू नीरजने हंगेरीची राजधानी बुडापेस्ट येथील नॅशनल ॲथलेटिक्स सेंटरमध्ये 88.17 मीटर भाला फेकून सुवर्णपदकावर कब्जा केला. अंतिम फेरीत एकूण ६ प्रयत्न झाले असून नीरजने दुसऱ्या फेरीपासून गुणतालिकेत आघाडी कायम ठेवली होती परंतु अंतिम फेरीत नीरज चोप्राची सुरुवात चांगली झाली नव्हती. त्याचा पहिलाच थ्रो फाऊल झाला. पहिल्या प्रयत्नानंतर नीरज एकूण १२ फायनलिस्टमध्ये शेवटच्या स्थानावर होता. कारण पहिल्या थ्रो मध्ये फाऊल करणारा तो एकमेव होता असे असूनही नीरज निराश झाला नाही आणि तिने त्याच्या पुढच्याच प्रयत्नात जबरदस्त पुनरागमन केले. नीरजच्या दुसऱ्या थ्रोमध्ये, भाला थेट ८८:१७ मीटर अंतरावर पडला आणि यासह नीरजने पहिल्या क्रमांकवर कब्जा केला. नीरजची ही आघाडी तिसऱ्या प्रयत्नानंतरही कायम राहिली आणि ८६ :३२ मीटर फेक करूनही तो पूर्वार्धात पहिल्या स्थानावर राहिला.

दुसरीकडे पाकिस्तानच्या अर्शद नदीमनेही संथ सुरुवातीनंतर पुनरागमन केले. अर्शदचा पहिला थ्रो ७४:८० आणि दुसरा ८२:८१ मीटर होता. नदीमने पुन्हा तिसऱ्या थ्रोमध्ये ८७:८२ मीटरचे अंतर पूर्ण केले. नीरजनंतर दुसरे स्थान पटकावले आणि रौप्य पदक जिंकले.

त्याच वेळी, भारताच्या डीपी मनूने तिसऱ्या प्रयत्नात ८३:७२ मीटरची थ्रो केली, तर किशोर जेनाने दुसऱ्या थ्रोमध्ये ८२:८२ मीटरचा टप्पा गाठला. अशाप्रकारे, दोन्ही भारतीय देखील टॉप-८ मध्ये राहिले आणि त्यांना दुसऱ्या हाफमध्ये स्थान मिळवता आले, जिथे त्यांना आणखी ३ थ्रो मिळाले. प्रत्येक मोठ्या चॅम्पियनशिप आणि इव्हेंटमध्ये पदक जिंकण्याची सवय लावलेल्या नीरजने भारतीय ॲथलेटिक्सच्या इतिहासात यापूर्वी कधीही न घडलेला पराक्रमही केला. वर्ल्ड चॅम्पियनशिपमध्ये २ पदके जिंकणारा नीरज पहिला भारतीय ठरला. नीरजने गेल्या वर्षी युजीनमध्ये झालेल्या चॅम्पियनशिपमध्ये रौप्य पदक जिंकले होते. पात्रता फेरीतील पहिल्याच प्रयत्नात नीरजने शुक्रवारी ८८:७७ मीटर फेक करून अंतिम फेरीत प्रवेश केला होता. या कामगिरीच्या जोरावर तो पुढील वर्षी पॅरिस येथे होणाऱ्या ऑलिम्पिकसाठी पात्र ठरला. ही त्याची मोसमातील आतापर्यंतची सर्वोत्तम कामगिरी आणि एकूण चौथी कामगिरी ठरली.

गेल्या वेळी नीरजने वर्ल्ड चॅम्पियनशिपमध्ये रौप्य पदक जिंकले होते. २५ वर्षीय भारतीय स्टार ॲथलीटने टोकियो ऑलिम्पिकमध्ये सुवर्णपदक जिंकले. २०१८ मधील आशियाई खेळ आणि राष्ट्रकुल क्रीडा स्पर्धेतही तो सुवर्णपदक जिंकण्यात यशस्वी ठरला. त्याने गेल्या वर्षी डायमंड लीगही जिंकली होती.