बांदा | राकेश परब : श्री. रामचंद्र पाटील यांनी गेले चार दशके केलेल्या सामाजिक कार्याची नोंद घेऊन त्यांना आज कोकण रत्न या कोकण कला व शिक्षण विकास संस्थेच्या राज्यस्तरीय पुरस्काराने गौरविण्यात आले. नायर हॉल दादर मुंबई येथे पार पडलेल्या सोहळ्यात संस्थेचे मार्गदर्शक श्री श्रीराम कुबल, व्यावसायिक श्री योगेश भोसले, लेखक दिग्दर्शक सुदर्शन गमरे, आय सी आय सी आयचे व्यवस्थापक सतीश लोखंडे, संस्थेचे खजिनदार प्रेम कुबल अशा मान्यवरांच्या हस्ते पुरस्कार वितरण सोहळा पार पडला. रामचंद्र पाटील यांची शारिरीक समस्या असल्याने त्यांच्या पत्नी सौ. सावित्री रामचंद्र पाटील यांनी हा पुरस्कार स्वीकारला. यावेळी लक्ष्मी गवस यांचाही मान्यवरांच्या हस्ते शाल श्रीफळ देऊन सत्कार करण्यात आला.

कार्यक्रमाची सुरुवात साक्षी सांगळे यांच्या टीमने नृत्याविष्कार सादर करून केली या संपूर्ण कार्यक्रमात अनेक मनोरंजनात्मक कार्यक्रमाची मेजवानी होती त्यात राजेश खन्ना यांची मिमिक्री करणारे कलाकार, उपस्थितांबरोबर वेगवेगळे मनोरंजनाचे खेळ, नृत्ये आणि विनोदी कलाकार सामील होते. या कार्यक्रमात संस्थाध्यक्ष श्री दयानंद कुबल यांचे वडिल श्रीराम कुबल यांचा ८० वा वाढदिवस साजरा करण्यात आला. या कार्यक्रमात शेकडो सामाजिक क्षेत्रातील कार्यकर्ते उपस्थित होते.

यावेळी बोलताना दयानंद कुबल म्हणाले की ४० वर्षे सामाजिक क्षेत्रात काम करणारे रामचंद्र पाटील हे एक आदर्शवत व्यक्ती आहेत, त्यांच्या कामाची दखल आताच्या पिढीने घेऊन सामाजिक क्षेत्रात कर्तव्य वाजवले पाहिजे. त्यांचा सत्कार करणे हे आमचे भाग्यच आहे, तर साधे राहणीमान आणि समाजभान ठेवणारे श्रीराम कुबल यांचा आदर्श घेऊन कोकण संस्था जनहीताचे कार्य जोमाने करेल असा विश्वास ही त्यांनी या वेळी व्यक्त केला. सामाजिक कार्यकर्त्या कु. हर्षला अमूप, सौ.जयश्री खोपकर, कु. स्वाती नलावडे यांनी कार्यक्रमाबद्दलच्या आपल्या भावना व्यक्त केल्या.

हा कार्यक्रम यशस्वी होण्यासाठी साक्षी पोटे, प्रीती पांगे, सूरज कदम, तारा सांगळे, योगिता मांजरेकर, दर्शना कांबळे, नीता कुबल, विश्वनाथ बेटकर, कोमल कांबळे, श्वेता सावंत, सिंड्रेला जोसेफ, बिना अहिरे, देव कुबल प्रवीण सुतार, लता लोखंडे, विलोकीता पाटील, विजया वाळके, सुनंदा कांबळे अशा कार्यकर्त्यांनी मेहनत घेतली. कार्यक्रमाचे सूत्रसंचालन अभिनेता अक्षय ओवळे यांनी केले तर आभार श्वेता चोरगे यांनी मानले.