सुयोग पंडित | मुख्य संपादक : न्यूयाॅर्कमध्ये दहशतवादी हल्ल्यात ट्वीन टाॅवर्स जमीनदोस्त झाले तरी तिथला वीज व जल पुरवठा खंडित झाले नव्हते हे विशेष..! आता हे उदाहरण संपूर्ण दुःखाची किनार असलेले आहे तरी एक गोष्ट महत्वाची की नागरीकांसाठीच्या मूलभूत सोयींची जी काळजी घेतली जाते हे ते एक उत्तम उदाहरण आहे.

निसर्गाचा वरदहस्त लाभलेल्या पृथ्वीवरील क्षेत्रात शाश्वत प्रगतीसाठी शाश्वत पर्यटन हा एक सर्वात महत्वाचा रोजंदारीचा तथा उदरनिर्वाह करायचा मार्ग आहे. शाश्वत पर्यटनाबाबत जागतीक स्तरावर जागृती होत आहेच परंतु पाणी व वीज हे दोन घटकसुद्धा पर्यटनासाठी अत्यावश्यक आहे व ती जबाबदारी स्थानिक यंत्रणांनी प्राधान्याने निभावणे हे प्राथमीक कर्तव्य आहे.

महाराष्ट्र राज्याचा विचार करता, गेल्या १० वर्षात राज्यातील विविध पर्यटन क्षेत्रांच्या प्रगतीचे प्रयत्न हे ‘सर्वपक्षीय आमदार व खासदारांनी’ आपापल्यापरिने प्राधान्याने केल्याचे लक्षात येईल. म्हणजेच पर्यटनासाठी मंच जरुर मिळतोय परंतु त्यावरील पुढील कर्तव्य ही नेमून दिलेल्या यंत्रणांच जबाबदारी आहे.

वीज…ही एक समस्या पर्टनवाढीसोबत आणखीन जास्त सजगतेने हाताळायची गरज आहे. ‘कर्मचारी कमी असणे…सामुग्री जुनी झालीय…’ वगैरे आता कालबाह्य ठरणारी कारणे झालीत कारण पर्यटन क्षेत्रांना आता मागे वळून पहायला वेळ नाही. वीज समस्येमुळे शेतकरी वर्ग जसा होरपळून निघतो तसाच पर्यटन क्षेत्रांतील लहान मोठा व्यापारी सुद्धा अक्षरशः हतबल होतो. विजेवर चालणार्या उपकरणांची वाट लागते आणि सोबतच रेफ्रीजरेटर सारखी उपकरणे वारंवार नादुरुस्त होतात. रेफ्रीजरेटर मधील शितपेये, नाशवंत पदार्थ यांच्या नुकसानीला कुठलेही पॅकेज नसते. सरळ भाषेत सांगायचे तर हाॅटेल व लाॅजिंग व्यावसायिक व्यवसायासाठी कर्ज काढून थकेल परंतु स्वतःच्या भविष्यासाठी पाच पैसेही बॅन्केत वेगळे साठवू शकणार नाही.

पर्यटन क्षेत्रासोबतच विद्यार्थी वर्ग आणि घरगुती वापरातील वीजेवर चालणारी उपकरणे हे घटकसुद्धा वीजेच्या लपंडावामुळे हताश होतायत हे सत्य वीज यंत्रणेला कळणे आवश्यक आहे. राज्यात अजून अख्खा पावसाळा जायचाय…त्याआधीच या सर्व घटकांवर नियमित काम होणे आवश्यक आहे. ‘सौर ऊर्जा’ जर यावर उपाय असेल तर तो निदान पर्यटन क्षेत्रांतील लहान मोठ्या व्यवसायिकांना निःशुल्क मार्गदर्शनासोबत वाजवी दरात उपलब्ध व्हावा तरच पर्यटन क्षेत्रांची ‘प्रगती’ शक्य आहे.

‘लोकांचा क्षोभ’ होण्या ऐवजी वीज यंत्रणेतील सर्वांनीच ‘लोकांचा लोभ’ कसा वाढेल त्यासाठी ‘झटणे’ आवश्यक आहे.