विवेक परब | ब्यूरो चीफ : हल्ली ऑनलाईन व्यवहार ही काळाची गरज बनली आहे. असे असले तरी अनोळखी व्यक्तींच्या फोनला बळी पडून बँक खाते खाली करण्याचेही प्रकार घडत आहेत. सध्या नाभिक व्यावसायिकही यांत भरडले जाण्याच्या घटना घडू लागल्या आहेत.
कणकवली, कुडाळ या शहरांमध्ये नाभिक व्यावसायिकांना फ्रॉड कॉल करुन त्यांना फसवण्यासाठी फोन येत आहेत. त्यामुळे सिंधुदुर्ग नाभिक संघटनेचे कार्यकर्ते रुपेश पिंगुळकर यांनाही या घटनेला तोंड द्यावे लागले आहे. या घटनेची दखल घेत सिंधुदुर्ग नाभिक संघटनेने तातडीची ऑनलाईन सभा घेऊन सिंधुदुर्ग पोलीस अधिक्षक यांना निवेदन देण्याचे ठरविले. सिंधुदुर्ग पोलीस अधिक्षक सौरभ अग्रवाल यांना सिंधुदुर्ग नाभिक संघटनेच्या पदाधिकाऱ्यांनी प्रत्यक्ष भेट घेत निवेदन देऊन आपल्याला मार्गदर्शन मिळण्यासाठी लेखी पत्र दिले आहे.
त्यावेळी जिल्हाध्यक्ष अनिल अणावकर, जिल्हा खजिनदार चंद्रशेखर चव्हाण, जिल्हा सल्लागार सुभाष चव्हाण, जिल्हा सचिव सुधीर चव्हाण, जिल्हा नेते जगदिश चव्हाण, रुपेश पिंगुळकर, माजी कुडाळ तालुकाध्यक्ष नितेश पिंगुळकर, कणकवली नाभिक कर्मचारी संघटनेचे कार्याध्यक्ष दशरथ चव्हाण, संपर्क प्रमुख निलेश चव्हाण, संजय कुबल, रोशन चव्हाण, मनोज चव्हाण, प्रकाश लाड आदी नाभिक व्यावसायिक प्रामुख्याने उपस्थित होते.