दत्तक पालक योजनेतून मिळणार विद्यार्थिनीस लाभ.

मसुरे | प्राजक्ता पेडणेकर :
अखिल महाराष्ट्र प्राथमिक शिक्षक संघाचे राज्यसंघटक, मसुरे नं.१ शाळेचे माजी पदवीधर शिक्षक श्री. प्रशांत पारकर यांनी आपल्या वाढदिवसाचे औचित्य साधून सा.फु.द.पा. योजनेत रोख ३०००/- देणगी देवून मसुरे नं.१ या शाळेतील एक विद्यार्थीनी दत्तक घेतली.
सावित्रीबाई फुले दत्तक पालक योजना ही जिल्हा परिषद सिंधुदुर्ग ची अभिनव योजना असून या योजनेत देणगीदारांकडून ३००० रुपये जमा केले जातात. या रक्कमेच्या व्याजातून शाळेतील गरीब व होतकरू विद्यार्थीनी निवडून तिचे प्राथमिक शिक्षण पूर्ण होईपर्यंत शिष्यवृत्ती लाभ दिला जातो. त्यानंतर नवीन विद्यार्थिनीची निवड केली जाते.
श्री.पारकर यांनी यापूर्वी केंद्रशाळा मसुरे नं.१ या ठिकाणी पदवीधर शिक्षक म्हणून काम केले होते. त्यांनी आपले आजोबा कै. राजाराम विठ्ठलशेठ पारकर यांच्या स्मरणार्थ रोख 3 हजार रुपयांची देणगी केंद्रशाळेच्या मुख्याध्यापिका सौ. शर्वरी सावंत यांच्याकडे सुपूर्द केली. यावेळी केंद्रप्रमुख श्री. नारायण देशमुख, पदवीधर शिक्षक विनोद कदम, विनोद सातार्डेकर, रामेश्वरी मगर, गुरुनाथ ताम्हणकर, गोपाळ गावडे तसेच केंद्रातील सर्व शिक्षक उपस्थित होते. पारकर सरांच्या दातृत्वाबद्दल प्रशालेचे शाळा व्यवस्थापन समिती अध्यक्ष सन्मेष मसुरेकर, माजी अध्यक्ष दत्तप्रसाद पेडणेकर आणि पालक यांनी आभार मानले.