चिंदर सेवा संघाचे सदस्य प्रसाद टोपले यांच्या सामाजिक बांधिलकीची सर्वत्र प्रशंसा.

शिरगांव | संतोष साळसकर : सिंधुदुर्ग जिल्ह्यातील चिंदर बाजार येथील श्री.प्रसाद टोपले यांना, आचरा पिरावाडी येथे नवी मुंबईचे श्री सचिन पंडित पाटील यांचे 12,500 रुपये व महत्वाची कागदपत्रे असलेले पाकिट सापडले.
पोस्ट खात्यात काॅन्ट्रॅक्ट धर्तीवर कार्यरत असलेल्या प्रसाद टोपले यांनी त्या पाकिटाविषयी समाज मंचावरील विविध समूहांवर तसेच ‘पळसंब सरपंच’ या वाॅटस् अप समूहावर त्याविषयी तत्काळ माहिती दिली आणि पाकिट मालकांचे नांव,फोटो व पत्ता नमूद करुन त्याविषयी त्यांना संपर्क करायचे आवाहन केले.

या समूहांपैकी ‘पळसंब सरपंच’ समूहावरील ती माहिती आपली सिंधुनगरी न्यूज चॅनेलचे संस्थापक व मुख्य संपादक सुयोग पंडित यांच्या निदर्शनाला आली. त्यानंतर त्यांनी त्याला बातमी स्वरुपात प्रसारित केले व चिंदर प्रतिनिधी व एडिटोरिअल असिस्टंट विवेक परब यांनी ती बातमी आचरा पोलिस स्टेशनचे पोलिस नाईक व पोलिस अक्षय धेंडे यांना पाठविली.
यानंतर पोलिसांचे मार्गदर्शन व सहकार्य यामुळे श्री सचिन पंडित पाटील यांना प्रसाद टोपले यांच्यापर्यंत पोहोचणे सुकर झाले.

प्रसाद टोपले यांची भेट घेऊन पाकिटाचे मूळ मालक श्री सचिन पंडित पाटील यांनी त्यांचे पाकिट पुन्हा त्यांच्याकडे घेतले असल्याचे सूत्रांकडून समजते.

दरम्यान सचिन पंडित पाटील यांचे एक नातेवाईक श्री.नितीन पवार देखील मुंबई येथून या घटनेत समाजमंचावरुन व दूरध्वनीवरुन सहकार्य करत होते.

या घटनेतील प्रामाणिकपणे सामाजिक बांधिलकी जपणारे श्री प्रसाद टोपले यांचि मुंबई तसेच सिंधुदुर्ग जिल्ह्यातील सर्व स्तरातून प्रशंसा होत आहे.