पावणाई स्वयंसहाय्यता बचत गटाचा महिलादिनी अनोखा उपक्रम

मसुरे | प्राजक्ता पेडणेकर: मसुरे परिसरातील निराधार, मूकबधिर महिला कुटुंबांना येथील पावणाई महिला स्वयं सहाय्यता बचत गट सदस्यांनी महिला दिनाचे औचित्य साधून जीवनावश्यक साहित्य वाटप केले. मसुरे मागवणे येथील निराधार आणि वृद्ध अशा सुशीला मनोहर परब जीवनावश्यक वस्तू आणि कपडे वाटप करत सामाजिक सेवेतील आपला खारीचा वाटा बचत गटाने उचलला. सर्वत्र आज विविध उपक्रमांनी महिला दिन साजरा होताना मात्र खऱ्या अर्थाने सामाजिक भावना जपणाऱ्या मसुरे येथील पावणाई स्वयंसहाय्यता बचत गटाचे सर्वत्र कौतुक होत आहे.

मसुरे येथील महिला, वेरली येथील एक मूकबधिर महिला कुटुंब आणि आणि लहान वयातच आईचे छत्र हरपलेली आणि वडील अपंग असलेली एक आठ वर्षाची कन्या अशा समाजातील तीन दुर्लक्षित आणि अतिशय परिस्थितीने गांजावलेल्या तीन महिला कुटुंबांना मसूरे येथील पावणाई महिला बचत गटाने महिला दिनाचे औचित्य साधून जीवनावश्यक वस्तू, कपडे याचे त्यांच्या घरी जाऊन वितरण केले. खरं पाहता ग्रामीण भागातील महिला बचत गट म्हणजे आर्थिक परिस्थितीने सुस्थितीत असलेला गट नसतो. परंतु गेले वर्षभर विविध उपक्रमातून या बचत गटाने जे काही तुटपुंजे आर्थिक उत्पन्न मिळविले या उत्पन्नातून त्यांनी समाजातील निराधार अशा अबलाना मदत करण्याचे ठरविले.

या वेळी या बचत गटाच्या अध्यक्षा हेमलता दुखंडे, उपाध्यक्ष नीलम दळवी, सचिव ज्योती पेडणेकर, सदस्य शितल मसुरकर, शाकीर शेख, नुरजहा शेख, मनीषा शिंदे, मोनिका दुखंडे, विजेता वेंगुरलेकर, सुरेखा परब, लक्ष्मी पेडणेकर, आणि या बचत गटाच्या सर्व महिला उपस्थित होत्या.