मसुरे | प्राजक्ता पेडणेकर : छत्रपती शिवाजी महाराज स्मारक समिती (रजि.) आणि संस्कृता फाउंडेशन ‘ विलेपार्ले यांच्या संयुक्त विद्यमाने येत्या ८ मार्च २०२२ जागतिक महिला दिनी ‘ भारताची सुपुत्री स्वरसम्राज्ञी गानकोकिळा भारतरत्न विभूषित स्व.श्रीमती लता मंगेशकर यांना ‘ राम रतन धन लता मंगेशकर’ या शीर्षकाद्वारे भारतरत्न लतादीदींना त्यांच्याच गाण्यांवर शास्त्रीय नृत्यातून आदरांजली वाहण्यात येणार आहे . प्रबोधनकार ठाकरे क्रीडा संकुल , शहाजी राजे मार्ग , विलेपार्ले ( पूर्व ),मुंबई ४०००५७ येथील प्रशस्त प्रागंणात महिला दिनी सायंकाळी ६ वाजता या कार्यक्रमाचे आयोजन करण्यात आले आहे .ख्यातनाम शास्त्रीय नृत्यपंडित व समकालीन सुप्रसिद्ध नृत्यांगना श्रीमती शुभदा वराडकर यांच्या संकल्पनेतून साकार झालेल्या विविध नृत्य माध्यमातील अनेक मान्यवर कलावंत लतादीदींच्या शाश्वत गीतांवर आपला नृत्याविष्कार सादर करून त्यांच्या प्रति आदरांजली व्यक्त करतील . मुंबईचे माजी महापौर व माजी आमदार स्व . श्री . रमेश यशवंत प्रभू यांनी २५ वर्षांपूर्वी छत्रपती शिवाजी महाराज स्मारक समितीची स्थापना केली . या समिती अंतर्गत चालविण्यात येणाऱ्या प्रबोधनकार ठाकरे क्रीडा संकुलात विविध खेळाद्वारे राष्ट्रीय व आंतरराष्ट्रीय स्तरावरील खेळाडू तयार व्हावेत , याकरिता निष्णात प्रशिक्षकांची नेमणूक केली आहे . क्रीडा प्रकारासह नृत्यकलेचेही शास्त्रशुद्ध प्रशिक्षण येथे दिले जाते . “राम रतन धन- लता मंगेशकर हा कार्यक्रम आयोजित केला असून तो सर्वांसाठी विनामूल्य आहे.सर्वांनी बहुसंख्येने उपस्थित रहावे”, असे आवाहन श्री अरविंद प्रभू यांनी छत्रपती शिवाजी महाराज स्मारक समिती (रजि.) यांच्यावतीने केले आहे.