बांदा | राकेश परब : शाळा व्यवस्थापन समितीने सातत्याने पाठपुरावा केल्यानंतर सिंधुदुर्ग जिल्ह्यातील सर्वाधिक पटसंख्या असलेल्या येथील जिल्हा परिषद केंद्रशाळेसाठी कायमस्वरूपी मुख्याध्यापक देण्यात आले आहेत. या शाळेच्या मुख्याध्यापकपदी श्रीकांत विठ्ठल आजगांवकर हे शाळेत रूजू झाले आहेत. यापूर्वी उपशिक्षिका सरोज नाईक या प्रभारी मुख्याध्यापक पद सांभाळत होत्या.
जिल्ह्यातील सर्वाधिक पटसंख्येची शाळा म्हणून ख्याती असलेल्या बांदा केंद्रशाळेत गेली दोन वर्षे मुख्याध्यापक पद रिक्त होते. शाळेच्या प्रभारी मुख्याध्यापिका म्हणून सरोज नाईक गेली दोन वर्ष पदभार सांभाळत होत्या. कायमस्वरूपी मुख्याध्यापक नसल्याने याचा परिणाम अध्यापनावर होत होता. पटसंख्या वाढल्याने प्रत्येक इयत्ताचे दोन वर्ग करण्यात आले आहेत. त्यामुळे शाळेतील शिक्षकांचे समायोजन करताना अडचणीचे ठरत होते. केंद्रशाळेची शैक्षणिक प्रगती ही वाखाणण्याजोगी असून शाळेने लोकसहभागातून तब्बल सात लाख रुपयांचा शैक्षणिक उठाव केला आहे. शाळेला कायमस्वरूपी मुख्याध्यापक मिळण्यासाठी शिक्षण व आरोग्य सभापती डॉ. अनिषा दळवी यांच्याकडे सातत्याने पाठपुरावा करण्यात आला होता.
नूतन मुख्याध्यापक श्रीकांत आजगांवकर हे शाळेत रूजू झाल्यावर शाळा व्यवस्थापन समिती अध्यक्ष निलेश मोरजकर, शाळा व्यवस्थापन समिती सदस्य उमेश तळवणेकर व शिक्षक यांच्या वतीने स्वागत करण्यात आले. यावेळी आजगांवकर यांनी शिक्षक, शाळा व्यवस्थापन समिती व ग्रामस्थांच्या सहकार्याने शाळेचा नावलौकीक वाढवुया असे सांगितले.