माळगांव ग्रंथालयात भरला कवींचा मेळा ;नवकविंना मौलिक मार्गदर्शन.

मसुरे | प्राजक्ता पेडणेकर : मराठी भाषा संवर्धन पंधरवड्या निमित्त माळगांव पंचक्रोशी ज्ञानप्रसारक मंडळ ग्रंथालय,माळगांव-बागायत येथे प्रसिद्ध मालवणी कवी तथा गझल मार्गदर्शक श्री. विजय जोशी यांच्याशी साहित्यिक गप्पा आणि कवीसंमेलनाचा कार्यक्रम संपन्न झाला. यानिमित्ताने मालवणी कवी श्री. रुजारिओ पिंटो, श्री. प्रमोद जोशी, श्री. नितीन वाळके, श्री. मंदार सांबारी, श्री. दीपक पटेकर, श्री. संजय धुरी यांनी आपल्या कविता सादर करुन कार्यक्रमात रंगत आणली.
कार्यक्रमाच्या सुरुवातीला थोर गझलकार मधुसुदन नानिवडेकर यांना श्रद्धांजली अर्पण करण्यात आली. बालवाचक कु. आर्या भोगले, स्वरा भोगले व यशश्री ताम्हणकर यांनी स्वागतगीत सादर केले. ग्रंथालय अध्यक्ष अरुण भोगले यांनी प्रास्ताविक केले. विजय जोशी यांनी कविता व गझल यांचे अंतरंग उलगडताना नवकवींना मार्गदर्शन केले. यावेळी बोलताना ते म्हणाले, “वेदनेतून आलेल्या संवेदनांचा आलेख म्हणजे कविता. कवीकडे वाचन अफाट असले पाहिजे. आपल्या बोलीभाषेतून जास्तीत जास्त लेखन झाले पाहिजे. आपल्या कवितेवर संस्कार होणे फार महत्त्वाचे आहे. कवितेवर प्रेम कराल तर नक्कीच कविता तुमच्यावर प्रेम करेल.”
कवी प्रमोद जोशी यांनीही आपल्या कवितांसोबत आपले अनुभव कथन केले. “कवीने आपल्या कवितेत मांडलेल्या वेदना काही वेळा वाचक समजून घेत नाहीत” ही खंत बोलून दाखवताना रसिकांनी कवितेतील भावना समजून त्याचा आस्वाद घ्यावा ही अपेक्षा व्यक्त केली.

यावेळी नितीन वाळके यांनी साहित्यिक परिसंवाद घडवून आणला. यात ज्योती तोरसकर, अर्चना कोदे, मंदार सांबारी यांनी सहभाग घेतला. श्री. विजय जोशी यांनी साहित्य क्षेत्रात केलेल्या उल्लेखनीय कामगिरीबद्दल ग्रंथालयाच्या वतीने श्री रुजारिओ पिंटो यांच्या हस्ते त्यांचा सत्कार करण्यात आला. यावेळी ग्रंथालय अध्यक्ष अरुण भोगले, सचिव गुरुनाथ ताम्हणकर, दीपक भोगले, ज्योती तोरसकर, अर्चना कोदे, महादेव सुर्वे, अरुण वझे, दत्ताराम भोगले, बापू राणे, मोडक, तन्वी राणे, छाया नाईक, मनाली परब व वाचक ग्रामस्थ उपस्थित होते.