ओरोस /प्रतिनिधी : ख्रिसमसनिमित्त २५ डिसेंबर आणि नववर्षाच्या निमित्ताने ३१ डिसेंबरच्या दिवशी होणाऱ्या सर्व प्रकारच्या सार्वजनिक कार्यक्रमांवर आणि फटाके फोडण्यावर बंदी घालावी. प्रमुख पर्यटनस्थळे, गड-किल्ले, ऐतिहासिक स्थळे आदी सार्वजनिक ठिकाणांवर मद्यपान, धूम्रपान, पार्ट्या करण्यावर प्रतिबंध आणावा. तसेच पोलिसांची गस्तीपथके नेमून याचे उल्लंघन करणाऱ्यांवर कारवाई करावी, याबाबत चे निवेदन हिंदू जनजागृती समितीच्या वतीने निवासी उपजिल्हाधिकारी दतात्रय भडकवाड याना देण्यात आले.

३१ डिसेंबरच्या रात्री मोठ्या प्रमाणात धूम्रपान, मद्यपान, अमली पदार्थांचे सेवन आदी केले जाते. तसेच या रात्री मद्यपान करून भरधाव वाहने चालवल्याने अपघातही होत आहेत. गंभीर बाब म्हणजे या रात्रीपासून मद्य पिण्यास आरंभ करणार्या युवा पीढीचे प्रमाण लक्षणीय असून यामध्ये अल्पवयीन मुले आणि महिला यांचाही समावेश आहे. रात्रभर मोठ्या आवाजाचे फटाके उडवून प्रदूषण करणे, तसेच कर्णकर्कश ध्वनीवर्धक लावणे, अश्लील अंगविक्षेप करून नाचणे, शिवीगाळ करणे, मुलींची छेडछाड, विनयभंग, बलात्कार आदी कृत्ये करून एकूणच कायदा अन् सुव्यवस्था यांच्या दृष्टीने गंभीर स्थिती निर्माण होत आहे . त्याचा अतिरिक्त ताण पोलीस आणि प्रशासन यांवर येतो. तसेच यामुळे देशाची युवापिढी नैतिकदृष्ट्या उद्ध्वस्त होण्याच्या मार्गावर आहे.

गेली दोन वर्षे कोरोना महामारीने देशभरात कहर केला आहे. ओमीक्रॉन नावाच्या कोरोनाच्या नवा व्हेरीयंटमुळे पुन्हा जगभरात कोरोनाची लाट येण्याची शक्यता आहे. फटाके फोडल्याने प्रदूषण होऊन मोठ्या प्रमाणात श्वसनाचे त्रास वाढतात. २५ डिसेंबर पासून ३१ डिसेंबरपर्यंत मोठ्या प्रमाणात पार्ट्या होतात, याद्वारे कोरोनाचा संसर्ग पसरण्याची शक्यताही अधिक आहे . या काळात सार्वजनिक आरोग्य धोक्यात घालणे परवडणारे नाही. त्यामुळे ख्रिसमसनिमित्त २५ डिसेंबरला आणि ख्रिस्ती नववर्षाच्या निमित्ताने ३१ डिसेंबरच्या दिवशी होणाऱ्या सर्व प्रकारच्या सार्वजनिक साजरीकरणावर ( सेलिब्रेशनवर ) आणि फटाके फोडण्यावर बंदी घालावी. प्रमुख पर्यटनस्थळे , गड-किल्ले, ऐतिहासिक स्थळे आदी सार्वजनिक ठिकाणांवर मद्यपान धूम्रपान अन् पार्ट्या करण्यावर प्रतिबंध आणावा. पोलिसांची गस्तीपथके नेमून याचे उल्लंघन करणाऱ्यांवर कारवाई करावी, अशी मागणी हिंदू जनजागृती समितीच्या वतीने निवासी उपजिल्हाधिकारी दतात्रय भडकवाड यांना निवेदनाद्वारे केली आहे. यावेळी निवेदन देताना गजानन मुंज, रवींद्र परब, डॉ. अशोक महिंद्रे उपस्थित होते.