बांदा | राकेश परब : बांदा शहरातील शेतकऱ्यांना १४ व्या व १५ व्या वित्त आयोगाच्या निधीतून कृषी अवजारे खरेदी करण्यासाठी अनुदान तत्वावर आर्थिक साहाय्य करण्याचा निर्णय बांदा ग्रामपंचायतीने घेतला आहे. यासाठी निधीची तरतूद करण्यात आली आहे. याबाबतची सविस्तर माहिती सरपंच अक्रम खान यांनी येथे आयोजित पत्रकार परिषदेत दिली.
सरपंच खान म्हणाले की, बांदा ग्रामपंचायतीने आतापर्यंत विविध लोकोपयोगी योजना राबविल्या आहेत. शहरातील शेतकऱ्यांना, तरुणांना शेती करण्यासाठी प्रोत्साहन देण्यासाठी एकरकमी अर्थसहाय्य देण्याचा निर्णय आम्ही घेतला. यासाठी १४ व्या व १५ व्या वित्त आयोगातुन निधीची तरतूद करण्यात आली आहे. या योजनेत समाविष्ट होणाऱ्या शेतकऱ्यांनी विहित नमुन्यात ग्रामपंचायत कार्यालयात २५ नोव्हेंबरपर्यंत अर्ज करावा. यासोबत बँक पासबुक, आधारकार्ड, सातबारा, आठ अ व रेशनकार्ड सोबत जोडणे आवश्यक आहे. परिपूर्ण प्रस्ताव सादर केल्यानंतर रक्कम लाभार्थीच्या बँक खात्यात थेट जमा करण्यात येणार आहे.
शहरातील शेतकऱ्यांनी जास्तीत जास्त संख्येने या योजनेचा लाभ घेण्याचे आवाहन सरपंच खान यांनी यावेळी केले. यावेळी उपसरपंच हर्षद कामत, ग्रामपंचायत सदस्य श्यामसुंदर मांजरेकर, रिया आलमेडा, किशोरी बांदेकर, ग्रामविस्तार अधिकारी प्रसाद ठाकूर आदी उपस्थित होते.