वराडकर हायस्कूल व कनिष्ठ महाविद्यालयात क्रांती दिन राष्ट्र समर्पित क्रांतिकारकांच्या कृतज्ञतेत साजरा.

प्रशालेच्या समाज शास्त्र विभागाचे विशेष आयोजन तर इतिहास अभ्यासक भूषण साटम यांचे मार्गदर्शनपर व्याख्यान.

मालवण | ब्यूरो न्यूज : सिंधुदुर्ग जिल्ह्यातील मालवण तालुक्यातल्या कट्टा येथील वराडकर हायस्कूल व कनिष्ठ महाविद्यालय कट्टा मालवण येथे क्रांती दिनानिमित्त विशेष कार्यक्रम संपन्न झाला. प्रशालेतील समाजशास्त्र विभागाच्या वतीने आयोजित ह्या विशेष कार्यक्रमाद्वारे विद्यार्थ्यांना क्रांतिकारकांच्या बलिदानाची जाणीव व्हावी हा हेतू होता. इतिहास अभ्यासक भूषण साटम हे ह्या व्याख्यानाचे व्याख्याते होते.

यावेळी मार्गदर्शन करताना भूषण साटम यांनी उपस्थित विद्यार्थी विद्यार्थिनींना, ब्रिटिशांच्या जुलमी शृंखलांत जखडलेल्या भारतमातेला मुक्त करण्यासाठी ज्या क्रांतीकारकांनी प्राणाची आहुती देत संघटन, कठोर राष्ट्रप्रेम, एकात्मता, शिस्तपालन, वज्रनिश्चय, गुरुजनांचा आणि आपल्या संस्कृतीचा, धर्माचा अभिमान या घटकांचे स्मरण करुन देत त्यांच्या कृतज्ञतेची अत्यावश्यकता तसेच माहिती दिली. आज भारत देश पुन्हा एकदा सुजलाम, सुफलाम बनवायचा असेल क्रांतिकारकांनी आचरणात आणलेले गुण आचरणात आणावेत असे आग्रहपर आवाहन देखिल व्याख्याते भूषण साटम यांनी केले. 

यावेळी व्यासपीठावर कट्टा पंचक्रोशी शिक्षण प्रसारक मंडळाचे सचिव सुनील नाईक, कट्टा केंद्रप्रमुख गौरव नाईक मुख्याध्यापिका सौ. देवयानी गावडे, पालक शिक्षक संघाचे सदस्य गणेश वाईरकर, समाजशास्त्र विभागाचे प्रमुख एकनाथ राऊळ, प्रशालेचे सहाय्यक शिक्षक किसन हडलगेकर उपस्थित होते.

यावेळी इयत्ता पाचवी ते आठवीच्या विद्यार्थ्यांसाठी वेशभूषा स्पर्धेचे आयोजन करण्यात आले होते प्रशालेचे सहाय्यक शिक्षक किसन हडलगेकर यांनी आभार मानले तर कार्यक्रमाचे सूत्रसंचालन समाजशास्त्र विभागाचे प्रमुख एकनाथ राऊळ यांनी केले.