'एमआयडिसी' मधील सर्व उद्योजकांना पोलिस प्रशासनाचे कामगारांची अद्यावय माहिती पोलिस ठाण्यात पुरविण्याचे आवाहन.

कुडाळ । प्रतिनिधी : कुडाळ औद्योगिक 'एमआयडिसी' क्षेत्रातील सर्व उद्योजक, कारखानदार व आस्थापनांनी त्यांच्या कंपनीत कार्यरत असलेल्या सर्व कामगार व नोकरांची अद्ययावत माहिती स्थानिक कुडाळ पोलिस ठाण्यात सादर करावी, असे आवाहन कुडाळ पोलिस प्रशासनाने केले आहे. 

पोलिसांनी दिलेल्या पत्रानुसार, अलीकडे घडलेल्या आक्षेपार्ह घटनेच्या पार्श्वभूमीवर भविष्यात कोणताही अनुचित प्रकार घडू नये, तसेच औद्योगिक परिसरातील कायदा व सुव्यवस्था अबाधित राहावी, यासाठी हा प्रतिबंधात्मक उपाय करण्यात येत आहे अशी माहिती मिळत आहे. याअंतर्गत उद्योग मालकांनी आपल्या कंपनीतील सर्व कामगारांची वैयक्तिक माहिती संकलित करून त्याची प्रत संबंधित पोलिस ठाण्यात जमा करावी. तसेच कामगारांची आवश्यक ती पडताळणी करण्याबाबतही सूचना देण्यात आल्या आहेत.

यासोबतच, परिसरातील नागरिकांनाही आवाहन करण्यात आले आहे की, जर कोणत्याही उद्योग, कंपनी किंवा व्यक्तीकडे परप्रांतीय कामगार वास्तव्यास अथवा कामावर असतील आणि त्यांची अधिकृत नोंद करण्यात आलेली नसल्याची माहिती असल्यास, ती तत्काळ कुडाळ पोलिस ठाण्याला कळवावी. नागरिकांच्या सहकार्यामुळे औद्योगिक परिसरातील गैरव्यवहारांना आळा घालण्यास मदत होईल, असे पोलिस प्रशासनाने स्पष्ट केले आहे. २९ जून २०२६ रोजीच्या एका पत्राद्वारे तसे सूचित करण्यात आले आहे.

कुडाळ MIDC परिसरातील सर्व उद्योजकांनी या सूचनांची गांभीर्याने दखल घेऊन आवश्यक ती कार्यवाही करावी, असे आवाहन पोलिस विभागाकडून करण्यात आले आहे.