रोझरी इंग्लिश स्कूलच्या 'ज्युनिअर व सिनिअर केजी' विद्यार्थ्यांचा 'प्रवेशोत्सव' उत्साहात. 

मालवण | प्रतिनिधी : सिंधुदुर्ग जिल्ह्यातील मालवण शहरातल्या रोझरी इंग्लिश स्कूल प्रशालेत, १७ जून २०२६ रोजी शाळेत नव्याने प्रवेश घेतलेल्या ज्युनिअर व सिनिअर केजीच्या विद्यार्थ्यांचा प्रवेशोत्सव समारंभ संपन्न झाला. प्रशालेचे मुख्याध्यापक फादर रेवरंड ॲन्थोनी डिसोज़ा यांनी शाळेत नव्याने प्रवेश घेतलेल्या ज्युनिअर व सिनिअर केजीच्या विद्यार्थ्यांचे स्वागत केले. यावेळी संबोधित करताना त्यांनी शालेय जीवन हे विद्यार्थ्यांच्या सर्वांगीण विकासाचा पाया असल्याचे सांगितले आणि विद्यार्थ्यांना आनंददायी व गुणवत्तापूर्ण शिक्षण देण्याचा शाळेचा संकल्प व्यक्त केला.

या प्रवेशोत्सव तथा स्वागत समारंभानिमित्त विद्यार्थ्यांसाठी विविध मनोरंजक व शैक्षणिक उपक्रम संपन्न झाले. ज्युनिअर व सिनिअर केजीच्या विद्यार्थ्यांनी आकर्षक नृत्य, बालगीते, समूह गीते सादर केली तसेच विविध खेळ व कृती आधारित उपक्रमही संपन्न झाले.

विद्यार्थ्यांच्या स्वागतासाठी असणाऱ्या सेल्फी बोर्ड, रंगीबेरंगी फुग्यांची सजावट, विविध भित्तीपत्रके तथा पोस्टर्सनी विद्यार्थ्यांसह सर्वांचेच विशेष लक्ष वेधून घेतले.

प्रशालेचे मुख्याध्यापक फादर रेवरंड ॲन्थोनी डिसोज़ा यांच्या प्रमुख मार्गदर्शनाखाली तसेच शिक्षक व शिक्षकेतर कर्मचाऱ्यांच्या सक्रीय सहभागाने यशस्वी झालेल्या या प्रवेशोत्सवाची प्रशंसा होत आहे.