डाॅ. शिरीष कदम यांचा महाराष्ट्र राज्य रेडिओलॉजिस्ट असोसिएशन तर्फे गौरव.

मालवणचे माजी नगराध्यक्ष व विद्यमान नगरसेवक महेश कांदळगावकर व उद्योजक सौ. स्मृती महेश कांदळगावकर यांच्यावतीने विशेष अभिनंदन.

मालवण | प्रतिनिधी : मुंबईतील सुप्रसिद्ध रेडिऑलाॅजिस्ट डाॅ. शिरीष रमाकांत कदम यांचा महाराष्ट्र राज्य रेडिओलॉजिस्ट असोसिएशन तर्फे विशेष सन्मानचिन्ह देऊन गौरव करण्यात आला आहे. डाॅ. शिरीष कदम यांना, मुंबईतील वांद्रे कुर्ला संकुलातील 'जिओ वर्ल्ड कन्वेंशन सेंटर' येथे १७ ते १९ एप्रिल २०२६ दरम्यान संपन्न झालेल्या आंतरराष्ट्रीय रेडिऑलाॅजिस्ट असोसिएशनच्या आयोजनातील मार्गदर्शन व योगदानाबद्दल महाराष्ट्र राज्य रेडिऑलाॅजिस्ट असोसिएशनच्या वतीने विशेष सन्मानचिन्ह देऊन गौरविण्यात आले.

मालवण नगरपरिषद माजी नगराध्यक्ष, शिवसेना जिल्हा संघटक व विद्यमान नगरसेवक महेश कांदळगावकर यांनी डाॅ. शिरीष कदम यांचे अभिनंदन करताना सांगितले की, मालवणच्या टोपीवाला हायस्कूलचे माजी विद्यार्थी असलेले डाॅ. शिरीष कदम हे शिक्षण, आरोग्य यांसह क्रिकेट, बास्केटबाॅलसह विविध क्रीडा प्रकार आणि सामाजिक क्षेत्रातील सक्रीय जाणकार आहेत. आयोजन, नियोजन यांसोबत विविध घटकांच्या पूर्तत्वाच्या पद्धतींची त्यांची अशी अभ्यासू शैली आहे. डाॅ. शिरीष कदम हे गेली दहा वर्षे 'स्पीड फाऊंडेशनच्या' माध्यमातून संस्थापक तसेच अध्यक्ष म्हणून करत असलेल्या कार्याचीही 'हा गौरव म्हणजे एक पोचपावती' असल्याचे सांगून माजी नगराध्यक्ष व विद्यमान स्विकृत नगरसेवक महेश कांदळगावकर यांनी डाॅ. शिरीष कदम यांची विशेष प्रशंसा केली आहे.

या विशेष गौरवाबद्दल मालवण नगरपरिषदेचे माजी नगराध्यक्ष व विद्यमान नगरसेवक महेश कांदळगावकर व उद्योजक सौ. स्मृती महेश कांदळगावकर यांच्यासह मुंबई, सिंधुदुर्ग जिल्हा व मालवणमधल्या विविध क्षेत्रातील मान्यवरांनी डाॅ. शिरीष रमाकांत कदम यांचे अभिनंदन केले आहे.