कुडाळ - मालवण तालुक्यातील नवीन आरोग्य उपकेंद्रांच्या बांधकामासाठी २ कोटी ८० लाखांचा निधी मंजूर.

सार्वजनिक आरोग्य व कुटुंब कल्याण मंत्री प्रकाश आबिटकर यांचे कुडाळ मालवणचे आमदार निलेश राणे यांनी मानले आभार.

मालवण | ब्यूरो न्यूज : १५ व्या वित्त आयोगाअंतर्गत कुडाळ - मालवण तालुक्यातील नवीन आरोग्य उपकेंद्रांच्या बांधकामासाठी २ कोटी ८० लाखांचा निधी मंजूर करण्यात आला आहे. यामध्ये मालवण तालुक्यात तारकर्ली तर कुडाळ तालुक्यात वाडोस, गोठोस, जांभवडे, घोटगे याठिकाणी नवीन इमारती मंजूर झाल्या आहेत, अशी माहिती मिळत आहे.

या निधीमुळे ग्रामीण व दुर्गम भागातील नागरिकांना दर्जेदार, सुलभ आणि वेळेवर आरोग्यसेवा उपलब्ध होणार असून, आरोग्य सुविधांचा दर्जा निश्चितच उंचावणार आहे. हा महत्त्वपूर्ण निधी मंजूर केल्याबद्दल राज्याचे सार्वजनिक आरोग्य व कुटुंब कल्याण मंत्री प्रकाश आबिटकर यांचे कुडाळ मालवणचे आमदार निलेश राणे यांनी आभार मानले आहेत.